ރާއްޖޭގެ މައި އެއަރޕޯޓުގައި ދިމާވެދާނެ ކުއްލި ނުރައްކަލުގެ ހާލަތްތަކާއި ކާރިސާތައް މެނޭޖުކުރުމުގެ ޤާބިލުކަން ފުޅާކުރުމުގެ ބޭނުމުގައި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ކަމާގުޅޭ ތިން އިދާރާއަކާ އެކު ފަހުމުނާމާތަކެއްގައި ސޮއިކޮށްފިއެވެ.
އެމްއޭސީއެލްގެ ފަރާތުން މި އެއްބަސްވުންތައް ޤާއިމުކޮށްފައި ވަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އާއި، މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް)ގެ އިތުރުން މޯލްޑިވްސް ރެޑް ކްރެސެންޓް (އެމްއާރްސީ) އާއެކުގައެވެ. “އެއާޕޯޓް ކްރައިސިސް މެނޭޖްމަންޓް”ގެ ނަމުގައި ކުރިއަށްގެންދިޔަ މި ޚާއްޞަ ހަފްލާގައި އެމްއޭސީއެލްގެ މެނޭޖިންގ ޑިރެކްޓަރ އަދި ސީއީއޯ އިބްރާހީމް ޝަރީފް މުޙައްމަދާއި، އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު އިބްރާހީމް މިމްރާހުގެ އިތުރުން އެ ކުންފުންޏާއި އެހެނިހެން މުއައްސަސާތަކުގެ އިސްވެރިން ބައިވެރިވެވަޑައިގަތެވެ.
މި ތާރީޚީ ފަހުމުނާމާތަކަކީ ވެލާނާ އިންޓަރނޭޝަނަލް އެއަރޕޯޓުގައި ހިނގާފާނެ ނުރައްކާތެރި ހާދިސާތަކަށް އެ ކުންފުނި ތައްޔާރުވެފައިވާ މިންވަރު އެތައް ގުނައަކަށް ކުރިއަރުވައިދޭނެ ފިޔަވަޅެއްކަމަށް އެމްއޭސީއެލްއިން ފާހަގަކުރެއެވެ. އެގޮތުން، އެއަރޕޯޓުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ކަމާބެހޭ އެންމެހާ ފަރާތްތައް ގުޅިގެން މަސައްކަތްކުރުމަށާއި، މުޢާމަލާތުކުރުމުގެ ހަރުދަނާ އޮނިގަނޑެއް އެކުލަވާލުމަކީ ނުހަނު މުހިންމު ކަމެއްކަމުގައި އެ ކުންފުނިން ދެކެއެވެ.
އަލަށް ވުޖޫދުކުރެވުނު މި އެއްބަސްވުންތަކުގެ އަލީގައި، ކުއްލި ހާލަތްތަކުގައި އެކި މުއައްސަސާތަކުން އަދާކުރަންޖެހޭ ޒިންމާތައް ވަރަށް ސާފުކޮށް ކަނޑައެޅިގެންދާނެއެވެ. އަދި އޭގެ އިތުރުން، ހުރިހާ އިދާރާތަކެއް ގުޅިގެން ޚާއްޞަ ތަމްރީނު ޕްރޮގްރާމްތަކާއި ސިމިއުލޭޝަން ކަސްރަތުތައް ހިންގުމަށް ވެސް ވަނީ މަގުފަހިވެފައެވެ.
އެއްބަސްވުންތަކުގައި ބައިވެރިވި އެންމެހާ ފަރާތްތަކަށް ޝުކުރު އަދާކުރައްވަމުން، އެމްއޭސީއެލްއިން ވަނީ ވީއައިއޭ އަކީ ކޮންމެފަދަ ނުރައްކާތެރި ހާލަތަކަށް ވެސް ފުރިހަމައަށް އިންތިޒާމުވެފައިވާ އެންމެ ރައްކާތެރި މާހައުލުކަމުގައި ދެމެހެއްޓުމަށް އެ ކުންފުނިން ކެނޑިނޭޅި މަސައްކަތްކުރާނެކަމުގެ ފުރިހަމަ ޔަޤީންކަން ދީފައެވެ.