ވ. އަތޮޅު އަލިމަތާ ކައިރީގައި އޮންނަ ކަނޑުއަޑީގެ ހޮހަޅައެއްގައި ބަޔަކު ތާށިވެގެން ހިނގި ހިތާމަވެރި ހާދިސާއާ ގުޅިގެން ކުރިއަށްގެންދިޔަ ނުރައްކާތެރި ޑައިވިންގ އޮޕަރޭޝަންގައި ހަރަކާތްތެރިވި ދިވެހި ސިފައިންނާއި ފުލުހުންގެ ހިތްވަރުގަދަ މަސައްކަތުގެ އަގުވަޒަންކުރުމުގެ ގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން އެ އޮފިސަރުންނަށް މިއަދު ބަންޑާރަކޮށީގައި ހަނދާނީ ލިޔުން އަރުވައިފިއެވެ.
މިކަމަށްޓަކައި ބަންޑާރަކޮށީގައި ބޭއްވި ހާއްސަ ރަސްމިއްޔާތުގައި ރައީސުލްޖުމްހޫރިއްޔާގެ މަންދޫބުންގެ ގޮތުގައި ބައިވެރިވެވަޑައިގަތީ ދާހިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާންއާއި ދިފާއީ ވުޒާރާގެ ވަޒީރުންނެވެ. މީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީއާއި ކޮމިޝަނަރ އޮފް ޕޮލިސް އަޙްމަދު މުޙައްމަދުގެ އިތުރުން ސަލާމަތީ ބާރުތަކުގެ އިސް ގިނަ އޮފިސަރުންތަކެއް ވަނީ މި ހަފުލާގައި ބައިވެރިވެވަޑައިގެންފައެވެ. މި ރަސްމިއްޔާތުގައި، ގައުމީ ހިދުމަތުގައި ފުރާނަ އަތްމައްޗަށް ލައިގެން ނުކުތް ބޭކަލުންނަށް ވަނީ ހިތްވަރުދީ، ސަރުކާރުގެ ފަރާތުން ޝުކުރު އަދާކޮށް ހަނދާނީ ލިޔުން ހަވާލުކޮށްފައެވެ.
މި ހާއްސަ އޮޕަރޭޝަނަކީ އިޓަލީވިލާތަށް ނިސްބަތްވާ ފަތުރުވެރިންތަކެއް ވ. އަތޮޅު ކަނޑުއަޑީގެ ހޮހަޅައަކަށް ޑައިވްކުރަން ގޮސް އުޅުމުގެ ތެރޭގައި ދިމާވި ހިތާމަވެރި ހާދިސާއަކާ ގުޅިގެން ކުރިއަށްގެންދިޔަ މަސައްކަތެކެވެ. މި ހާދިސާގައި އިޓަލީގެ ޖެނޯއާ ޔުނިވަރސިޓީގެ ޕްރޮފެސަރު މޮނިކާ މޮންޓެފަލްކޯންއާއި، އޭނާގެ ދަރިފުޅު ޖިއޯޖިއާ ސޮމަކަލް، ރިސާޗަރު މުރިއެލް އޮޑެނީނޯ އަދި ފެޑެރީކޯ ގުއަލްޓިއޭރީގެ އިތުރުން “ޑޫކް އޮފް ޔޯކް” ސަފާރީގެ އިންސްޓްރަކްޓަރު ޖިއާންލޫކާ ބެނެޑެޓީ ވަނީ މަރުވެފައެވެ.
މި މީހުން ހޯދުމަށް ފުލުހުންނާއި ސިފައިން ގުޅިގެން ހިންގި މި ނުރައްކާތެރި އަދި އުނދަގޫ އޮޕަރޭޝަންގެ ތެރޭގައި ދިވެހި ސިފައިންގެ ހިތްވަރުގަދަ ބޭކަލަކުވެސް ވަނީ ނިޔާވެފައެވެ. ސަރުކާރުން މިއަދު އަގުވަޒަންކޮށްފައި ވަނީ މިފަދަ ނުރައްކާތެރި ހާލަތެއްގައި ވެސް ފަސްޖެހުމެއްނެތި ގައުމީ ވާޖިބު އަދާކުރި ހިތްވަރުގަދަ އޮފިސަރުންގެއެވެ.