ސަޢޫދީ އަރަބިއްޔާގެ ކަމާބެހޭ އިދާރާތަކުން، މިއަހަރުގެ ޙައްޖު ދުވަހު މައްކާގެ މަސްޖިދު ނަމިރާގައި އިއްވާ ޚާއްޞަ ޚުތުބާ، ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް ފަސޭހައިން އޮޅުންފިލުވައިދިނުމުގެ މަތިވެރި މަޤުޞަދުގައި 35 ބަހަކަށް ތަރުޖަމާކުރަން ނިންމައިފިއެވެ.
ސަޢުދީގެ ރިލިޖަސް އެފެއަރޒުން ހާމަކޮށްފައިވާ ގޮތުގައި، ދުނިޔޭގެ ކޮންމެ ހިސާބަކަށްވެސް މި މުހިންމު މެސެޖު ފޯރުކޮށްދިނުމަށް ކުރާ މަސައްކަތުގެ ދަށުން މި ފިޔަވަޅު އަޅާފައިވާއިރު، މިއަހަރުގެ ޚުތުބާ ދެއްވުމަށް ހަމަޖެހިފައިވަނީ މަސްޖިދުއްނަބަވީގެ އިމާމު އަދި ފުންނާބުއުސް ދީނީ ޢިލްމުވެރިޔާ ޝައިޚް އަލީ ބިން ޢަބްދުލްރަޙްމާން އަލް-ޙުޛައިފީއެވެ.
އަރަފާތު ބިމުގައި ދެވޭ މި ޚުތުބާއަކީ އިސްލާމީ އުއްމަތަށް ނުހަނު ބޮޑު ތާރީޚީ އަދި ދީނީ އަހައްމިއްޔަތުކަމެއް ލިބިގެންވާ އެއްޗެކެވެ. މިއީ ކީރިތި ރަސޫލާ (ޞޢވ) ކުރެއްވި ޙައްޖަތުލް ވަދާޢުގައި މުޅި އުއްމަތަށް ދެއްވި ފަހުގެ ވަޞިއްޔަތްޕުޅުތަކުން ޢިބުރަތް ޙާޞިލުކުރުމަށް ލިބޭ ރަނުގެ ފުރުޞަތެކެވެ. އެކަލޭގެފާނުގެ އެ ޚުތުބާގައި މައިގަނޑު ގޮތެއްގައި ބާރުއަޅުއްވާފައިވަނީ މުސްލިމުންގެ މެދުގައި އޮންނަންޖެހޭ އެއްބަނޑުއެއްބަފާކަމާއި، ހަމަހަމަކަމުގެ އިތުރުން ކެތްތެރިކަން އިސްކުރުމުގެ މައްޗަށެވެ.
ކޮންމެ އަހަރެއްގެ ޙައްޖު ދުވަހު މި ޚުތުބާ އިއްވަމުން އަންނަނީ އަރަފާތު ބިމުގައި ހުންނަ ނަމިރާ މިސްކިތުގައެވެ. ތާރީޚީ ފަތްފުށްތަކުން އެނގޭ ގޮތުގައި މި ބިނާ ޤާއިމުކުރެވިފައިވަނީ، ޚުތުބަތުލް ވަދާޢު ދެއްވުމަށް ރަސޫލާ (ޞޢވ) ކުރެއްވި ދަތުރުފުޅުގައި އެކަލޭގެފާނު މަޑުކޮށްލެއްވި ބިމުގައެވެ. އޭރު އެ ޚުތުބާ ދެއްވީ އަރަފާތާ އިންވެގެން އޮންނަ އުރަނާ ވާދީގައެވެ. ކައިރީގައިވާ ފަރުބަދައަކަށް ނިސްބަތްކޮށް މިސްކިތަށް ނަންދެވިފައިވީނަމަވެސް، މަސްޖިދު އިބްރާޙިމް އަލް-ޚަލީލް އަދި މަސްޖިދު އުރަނާ ފަދަ ނަންނަމުންވެސް މި ބިނާއަށް މުޚާޠަބުކުރެއެވެ.
މައްކާގައި ހުންނަ ދެވަނައަށް އެންމެ ބޮޑު މިސްކިތުގެ ގޮތުގައި ބެލެވޭ މަސްޖިދު ނަމިރާއަކީ 110،000 އަކަމީޓަރުގެ ބޮޑު ސަރަޙައްދެއްގައި ބިނާކޮށްފައިވާ، އެއްފަހަރާ ހަތަރު ލައްކައެއްހާ މީހުންނަށް ނަމާދުކުރެވޭވަރުގެ ޖާގަ ތަނަވަސް ތަނެކެވެ. މި ބިޔަ ބޮޑު މިސްކިތަކީ މުޅި އަހަރު ދުވަހުގެ ތެރެއިން ހަމައެކަނި އަރަފާތު ދުވަހު އެކަނި ނަމާދުކުރުމަށް ބޭނުންކުރާ ޚާއްޞަ ބިނާއެކެވެ.