އިއްޔެ ހަވީރުގެ ވަގުތެއްގައި ގެއިން ނުކުތް ގޮތަށް ވީނުވީއެއް ނޭނގި ގެއްލިގެން މާލެއިން ހޯދަމުންދިޔަ އުމުރުން ފަނަރަ އަހަރުގެ ޢާއިޝަތު އަލްޔާ ޢަލީ، ހާލު ރަނގަޅަށް ހުއްޓާ މިއަދު ފެނިފައިވާކަން ދިވެހި ފުލުހުންގެ ޚިދުމަތުން ހާމަކޮށްފިއެވެ.
މާލޭގެ ހ.މ ފްލެޓް 05-3-2 އަށް ނިސްބަތްވާ މި ކުއްޖާ ގެއްލިގެން ފުލުހުންނަށް ރިޕޯޓުކޮށްފައިވަނީ ރޭ ދަންވަރުގެ ވަގުތެއްގައެވެ. ކުއްޖާގެ އާއިލާއިން ފުލުހުންނަށް މައުލޫމާތު ދީފައިވާ ގޮތުގައި، އިއްޔެ ހަވީރު އޭނާ ގެއިން ބޭރަށް ދިޔަ ފަހުން އެއްވެސް ޚަބަރެއް ވެފައެއް ނުވެއެވެ.
އަޕްޑޭޓް: އަލްޔާ މިހާރު ވަނީ ފެނިފައެވެ. ކުއްޖާގެ ހާލު ރަނގަޅެވެ. https://t.co/hmaWapaMMS
— Maldives Police (@PoliceMv) May 6, 2026
ނަމަވެސް، ފުލުހުން މިއަދު ކަށަވަރުކޮށްދީފައިވާ ގޮތުގައި، މިހާރު އެ ކުއްޖާ ވަނީ ސަލާމަތުން ހުއްޓާ ފެނިފައެވެ. އަދި ކުއްޖާ ފެނުނުއިރު ސިއްހީ ގޮތުން އެއްވެސް މައްސަލައެއް ނެތް ކަމަށާއި އޭނާގެ ހާލު ރަނގަޅުކަމަށް ވެސް އެ އިދާރާއިން ބުނެފައިވެއެވެ.
މީގެ އިތުރުން، މިފަދަ ހާދިސާތަކާ ގުޅިގެން މީހުން ހޯދުމަށް ފުލުހުން ކުރަމުންދާ މަސައްކަތްތަކުގައި އާންމު ރައްޔިތުންގެ ފަރާތުން ލިބެމުންދާ ފުރިހަމަ އެއްބާރުލުމާއި އެހީތެރިކަން ފާހަގަކޮށް، ފުލުހުން ވަނީ މުޖުތަމައުގެ ފަރުދުންނަށް ވަރަށް ހާއްސަ ޝުކުރެއް އަދާކޮށްފައެވެ.