ނިމިދިޔަ ލޯކަލް ކައުންސިލް އިންތިޚާބުގައި ދ. މީދޫ ކައުންސިލްގެ ރައީސްކަމުގެ މަގާމަށް ވާދަކޮށް އެންމެ ވޯޓެއްގެ ތަފާތުން ބަލިވި ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ)ގެ ކެންޑިޑޭޓް ސުހާ އިބްރާހީމްގެ ފަރާތުން، އެ އިންތިޚާބުގެ ނަތީޖާއާ މެދު ސުވާލު އުފައްދައި ހުށަހެޅި މައްސަލަ ދިވެހިރާއްޖޭގެ ހައިކޯޓުން ބަލައިގަނެ އަޑުއެހުންތަކަށް ތައްޔާރުވެއްޖެއެވެ.
މި މަހުގެ 4ވަނަ ދުވަހު ކުރިއަށްދިޔަ މި އިންތިޚާބުގެ ވަގުތީ ނަތީޖާ އެންމެ ފުރަތަމަ ދެއްކި ގޮތުން ކުރީގައި އޮތީ ސުހާއެވެ. އެގޮތުން ސުހާއަށް 393 ވޯޓު ލިބފައިވާއިރު، އޭނާއާ އެންމެ ގާތުން ވާދަކުރެއްވި އެމްޑީއޭގެ ކެންޑިޑޭޓް މުޙައްމަދު ޝާހިދަށް ލިބިފައި ވަނީ 392 ވޯޓެވެ. ނަމަވެސް، ލ. ފޮނަދޫގައި ބަހައްޓާފައި ހުރި ވޯޓު ފޮށްޓަކަށް، ވޯޓުލުމުގެ ޝަރުޠު ފުރިހަމަނުވާ ފަރާތަކުން ވޯޓުލާފައިވާ މައްސަލައެއް ފެންމަތިވުމާ އެކު، ދެ ކެންޑިޑޭޓުންގެ ފަރާތުން ވެސް ވަނީ އެ ފޮށި އަލުން ގުނުމަށް އެދިފައެވެ.
މި ޝަކުވާއާ ގުޅިގެން އިލެކްޝަންސް ކޮމިޝަން (އީސީ) ގެ ކޮމްޕްލެއިންޓްސް ބިއުރޯގެ މެންބަރުންގެ އިއްތިފާޤުން ވަނީ، މައްސަލަ އުފެދުނު ވޯޓަކީ ބާތިލު ވޯޓެއްކަމަށް ކަނޑައަޅައި، ޖުމްލަ ނަތީޖާއިން އެ ވޯޓު އުނިކުރުމަށް ނިންމާފައެވެ. މި ބަދަލާ އެކު އީސީން އިޢުލާންކުރި ރަސްމީ ނަތީޖާ ދައްކާގޮތުން، 392 ވޯޓާ އެކު އިންތިޚާބު ކާމިޔާބުކުރެއްވީ ޝާހިދެވެ. އަދި ސުހާއަށް ލިބުނު ވޯޓުގެ އަދަދު ވަނީ 391 އަށް ވެއްޓިފައެވެ.
ޤާނޫނުއަސާސީގެ 172ވަނަ މާއްދާއިން އިންތިޚާބީ ޝަކުވާތައް ކޯޓަށް ހުށަހެޅުމުގެ ޙައްޤު ކޮންމެ ރައްޔިތަކަށް ކަށަވަރުކޮށްދީފައިވާއިރު، އިންތިޚާބުތަކާ ބެހޭ ޢާންމު ޤާނޫނު ބަޔާންކުރާ ގޮތުން މިފަދަ މައްސަލަތައް ބެލުމުގެ ފުރަތަމަ މަރުޙަލާގެ އިޚްތިޞާޞް ލިބިދީފައި އޮންނަނީ ހައިކޯޓަށެވެ. އަދި ޤާނޫނުގައިވާ ގޮތުންނަމަ ރަސްމީ ނަތީޖާ އިޢުލާންކުރާތާ ގިނަވެގެން 14 ދުވަހުގެ ތެރޭގައި ހައިކޯޓަށް އެފަދަ މައްސަލަތައް ހުށަހަޅަންޖެހެއެވެ.