ށ. ފޯކައިދޫ ކައުންސިލަށް ބަރު އުޅަނދުތަކެއް ގަތުމަށް ކުރިއަށްގެންދިޔަ 1.2 މިލިއަން ރުފިޔާގެ ބޮޑު މަޝްރޫޢެއް، އަމިއްލަ ކުންފުންޏަކުން ވަގު ލިޔެކިޔުންތަކެއް ހުށަހަޅައިގެން ކާމިޔާބުކޮށްފައިވާކަން އެ ކައުންސިލްގެ އެންމެ ފަހުގެ އޮޑިޓް ރިޕޯޓުން ފަޅާއަރައިފިއެވެ.
އޮޑިޓަރ ޖެނެރަލް އޮފީހުން ނެރުނު 2024ވަނަ އަހަރުގެ އޮޑިޓް ރިޕޯޓުގައި ބަޔާންކޮށްފައިވާ ގޮތުން، ކައުންސިލަށް ބޭނުންވާ ޑަމްޕްޓްރަކަކާއި އެކްސްކަވޭޓަރެއް ހޯދުމަށް އިއުލާނުކުރި ބީލަންތައް ކާމިޔާބުކުރީ އެއް ފަރާތަކުންނެވެ. މި ބީލަންތައް އެވޯޑުކޮށްފައި ވަނީ، ހުށަހެޅި ލިޔެކިޔުންތަކުގެ ސައްހަކަން ކަށަވަރުކުރުމެއް ނެތިއެވެ. ނަތީޖާއެއްގެ ގޮތުން، އެ ކޮންޓްރެކްޓަރު ހުށަހެޅި ފޯޖުކޮށްފައިވާ ތަޖުރިބާގެ ލިޔުންތަކާއި، މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ޓެކްސް ކްލިއަރެންސް ރިޕޯޓަށް ބިނާކޮށް މަސައްކަތް ވަނީ ހަވާލުކުރެވިފައެވެ.
އޮޅުވާލައިގެން ބީލަން ކާމިޔާބުކުރި ނަމަވެސް، އެއްބަސްވުމާ އެއްގޮތަށް އެ ދެ އުޅަނދު މިހާރު ފޯކައިދޫ ކައުންސިލާ ހަވާލުކޮށްފައިވާކަން އޮޑިޓުން ފާހަގަކުރެއެވެ. އެހެންނަމަވެސް، ދައުލަތުގެ އިދާރާއަކަށް ވަގު ލިޔުންތަކެއް ހުށަހެޅުމަކީ ޖިނާއީ ބޮޑު ކުށަކަށް ވާތީ، ކަނޑައެޅިފައިވާ އުސޫލުތަކުގެ ތެރެއިން މައްސަލަ ތަހުގީގުކުރުމަށް މޯލްޑިވްސް ޕޮލިސް ސަރވިސްއަށް ހުށަހެޅުމަށް އޮޑިޓަރ ޖެނެރަލްގެ އޮފީހުން ވަނީ ލަފާދެއްވާފައެވެ.
ދިވެހިރާއްޖޭގެ ޤާނޫނުލްޢުޤޫބާތު ބަޔާންކުރާ ގޮތުން، ސައްހަނޫން ލިޔެކިޔުން ދައުލަތަށް ހުށަހެޅުމަކީ ސީރިއަސް މައްސަލައެކެވެ. އެގޮތުން، އެ ޤާނޫނުގެ 311 ވަނަ މާއްދާގެ ދަށުން، އޮޅުވާލާފައިވާކަން އެނގިހުރެ އެފަދަ ލިޔުމެއް ބޭނުންކުރުމަކީ މަކަރާއި ހީލަތް ހެދުމުގެ ކުށެކެވެ. ހަމައެއާ އެކު، 521 ވަނަ މާއްދާގެ ދަށުން، ދައުލަތުގެ މުވައްޒަފަކަށް ނުވަތަ އިދާރާއަކަށް ގަސްތުގައި ދޮގު މައުލޫމާތު ދިނުމާއި ވަގު ލިޔުން ހުށަހެޅުމަކީ، އިދާރީ ނިންމުންތަކަށް ނުފޫޒު ފޯރުވުމުގެ ކުށެއްގެ ގޮތުގައި ބެލެވި ދައުވާކުރެވޭނެ ކަމެކެވެ.