ދިވެހި ފުލުހުންގެ ޚިދުމަތުގެ އޮޕަރޭޝަނަލް ގާބިލުކަން އިތުރުކުރުމުގެ މަޤުޞަދުގައި، މާލެ ސަރަހައްދާއި ރާއްޖޭގެ އެކި ރަށްރަށުގައި މިއަދު ހެނދުނު ފުލުހުންގެ ޚާއްޞަ ތަމްރީނު ޕްރޮގްރާމްތަކެއް ފަށައިފިއެވެ.
ފުލުހުންގެ އިދާރާއިން ހާމަކޮށްފައިވާ ގޮތުގައި މި ފަރިތަކުރުންތައް މިއަދު ހެނދުނު 08:00 ފެށިގެން ހަވީރު 16:00 ކުރިއަށްދާނެއެވެ. މި ވަގުތުތަކުގެ ތެރޭގައި ތަފާތު އެކި ސަރަހައްދުތަކުގައި ފުލުހުންގެ ހަރަކާތްތައް އިތުރުވެ، ފުލުހުންގެ އުޅަނދުފަހަރު އާންމުކޮށް ފެންނަ ވަރަށްވުރެ ގިނައިން މަގުމަތިން ފެނިގެންދާނެކަމަށް އެ މުއައްސަސާއިން މަޢުލޫމާތުދެއެވެ. މީގެ ތެރޭގައި ރައްކާތެރިކަން ކަށަވަރުކުރުމަށް ހިންގާ ތަފާތު އޮޕަރޭޝަންތަކާއި ޢަމަލީ ފަރިތަކުރުންތައް ހިމެނެއެވެ.
ދިވެހި ފުލުހުންގެ ޚިދުމަތުން މާލެއާއި އަތޮޅުތަކުގައި ކުރިއަށްގެންދާ ހާއްސަ ތަމްރީނުތަކެއް މިއަދު އޮންނާނެއެވެ. މި ތަމްރީނުތައް ކުރިއަށްގެންދިއުމަށް ހަމަޖެހިފައިވަނީ މިއަދު ހެނދުނު 08:00 އިން ހަވީރު 16:00 އަށެވެ.
މި ވަގުތުތަކުގައި މަގުމަތީގައި ފުލުހުންނާއި ފުލުހުންގެ…
— Maldives Police (@PoliceMv) April 1, 2026
މިއީ ސަލާމަތީ ގޮތުން ފުރިހަމަކުރަންޖެހޭ ކަންކަމަށް ފާރަވެރިވުމަށާއި، ފުލުހުންގެ ހުނަރުވެރިކަން ތަރައްޤީކުރުމަށްޓަކައި ސިލްސިލާކޮށް ކުރިއަށްގެންދާ ހަރަކާތްތަކެކެވެ. މީގެ އިތުރުން، ޤައުމީ ފެންވަރުގައި ބާއްވާ ބޮޑެތި އިންތިޚާބުތަކާއި އެނޫންވެސް މުހިންމު ކަންކަމަށް ސަލާމަތީ ބާރުތަކުން އަބަދުވެސް އަންނަނީ މިފަދަ ތަމްރީނުތައް މެދުވެރިކޮށް ދުރާލާ ތައްޔާރުވަމުންނެވެ.
މުޅި ރާއްޖެއަށް އަމާޒުކޮށްގެން ހިންގާ މި ފަރިތަކުރުންތައް ކުރިއަށް ގެންދިއުމުގައި އާންމު ރައްޔިތުންގެ ފަރާތުން އަބަދުވެސް ލިބެމުންދާ ފުރިހަމަ އެއްބާރުލުމާއި އެހީތެރިކަން ފާހަގަކޮށް ފުލުހުން ވަނީ ޝުކުރު އަދާކޮށްފައެވެ.