ކޯޓުގައި ހިނގަމުންދާ މައްސަލައެއްގެ ހެއްކަށް ނުފޫޒު ފޯރުވުމަށް މަސައްކަތްކޮށްފާނެކަމުގެ ބިރު އޮތުމުން، ކޯޓު އަމުރެއްގެ ދަށުން ފުވައްމުލަކު ސިޓީއަށް ނިސްބަތްވާ ދެ ފިރިހެނަކު މިރޭ ދިވެހި ފުލުހުންގެ ޚިދުމަތުން ހައްޔަރުކޮށްފިއެވެ.
ފުލުހުން މައުލޫމާތު ދެއްވާފައިވާ ގޮތުގައި، މި މައްސަލައާ ގުޅިގެން ގާނޫނީ ބަންދަކަށް ގެންގޮސްފައި ވަނީ ފުވައްމުލަކު ސިޓީ ދޫޑިގަން، ޒަމާނީގެ، ޙަސަން އާޒިމްގެ އިތުރުން އެ ސިޓީގެ ކަރަންކާވިލާ، އަޙްމަދު ނިއުޝާދެވެ.
މިއީ މި ދެމީހުންގެ މައްޗަށް ދައުލަތުން ކޯޓުގައި ދައުވާ އުފުލާފައިވާ މައްސަލައަކާ ގުޅިގެން އެކަމުގެ ހެކި ނައްތާލުން ނުވަތަ ހެކިވެރިންނަށް ބިރުދެއްކުން ފަދަ އަމަލެއް ހިންގަފާނެކަމަށް ބެލެވިގެން އެޅި ފިޔަވަޅެއްކަމަށް ފުލުހުންވަނީ ހާމަކުރައްވާފައެވެ.
ކޯޓުން ނެރެފައިވާ އަމުރެއްގެ ދަށުން މިރޭގެ ވަގުތެއްގައި މި ދެމީހުން ހައްޔަރުކުރުމަށްފަހު، އާންމުންގެ ސަމާލުކަމަށް މިކަން ގެނައުމުގެ ގޮތުން ފުލުހުންގެ އިދާރާއިން ވަނީ އެ ފަރާތްތަކުގެ ފޮޓޯއާއި ވަނަވަރު ވެސް މީޑިއާތަކާ ހިއްސާކޮށްފައެވެ.