ހަ ކިލޯއަށްވުރެ ގިނަ މަސްތުވާތަކެތި ރާއްޖެއަށް އެތެރެކުރި ތިން މީހަކު, ވެލާނާ އިންޓަނޭޝަނަލް އެެއަރޕޯޓުން ހައްޔަރުކޮށްފިއެވެ.
ފުލުހުންގެ ޚިދުމަތުން ބުނީ، މި މައްސަލައާ ގުޅިގެން ހައްޔަރުކޮށްފައި ވަނީ ގދ. ގައްދޫ / ހިތިލާގެ، ޢަލީ ޢިރުފާނު (28އ)، ދަނޫޝްކާނދަން ގޯޕާލް، އިންޑިއާ (19އ)ގެ އިތުރުން ކަތިރިވިލް މަނިމަރަން، އިންޑިއާ (21އ)ކަމަށެވެ. އަދި މި ތިން މީހުން އެއަރޕޯޓުން ހައްޔަރުކޮށްފައި ވަނީ މި މާރިޗު މަހުގެ 3ވަނަ ދުވަހު ކަމަށާއި ފުލުހުންނާ މި މީހުން ހަވާލުކޮށްފައި ވަނީ މޯލްޑިވްސް ކަސްޓަމްސް ސަރވިސްއިން ކަމަށް ވެސް ފުލުހުން މަޢުލޫމާތުދެއެވެ.
މި މައްސަލައިގައި އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޢަލީ ޢިރުފާނަށް ވަނީ ޝަރީޢަތް ނިމެންދެން އަދި ދެންތިބި ދެ މީހުންނަށް ވަނީ 5ދުވަހަށް ބަންދު ކުރުމަށް އަމުރުކޮށްފައި ކަމަށް ފުލުހުން ބުނެއެވެ.
މި މައްސަލަ ފުލުހުންގެ ޑްރަގު އެންފޯސްމަންޓުން ގެންދަނީ އިތުރަށް ތަޙްޤީޤު ކުރަމުންނެވެ.