އދ. އޮމަދޫގައި އަލަށް އިމާރާތްކުރި މިސްކިތް ރަސްމީކޮށް މިއަދު ހުޅުވައިފިއެވެ.
“މަސްޖިދުއްރަޙުމާ”ގެ ނަމުގައި ބިނާކުރި އެ މިސްކިތް ހުޅުވީ މިއަދު ބޭއްވި ހާއްސަ ރަސްމިއްޔާތެއްގައެވެ.
އެ މިސްކިތް ހުޅުވައިދެއްވީ އިސްލާމިކް މިނިސްޓްރީގެ ސްޓޭޓް މިނިސްޓަރު އަބްދުލް އަޒީޒް ޖަމާލް އަބޫބަކުރުއެވެ.
އެ މިސްކިތަކީ ހެޔޮއެދޭ ފަރާތަކުން އެ ރަށުގެ ރައްޔިތުންނަށްޓަކައި ބިނާކޮށްދީފައިވާ ރީތި މިސްކިތެކެވެ.
އެ މިސްކިތާއެކު އޮމަދޫގައި ނަމާދު ކުރާނެ ޖާގައިގެ ދަތިކަމަށް ބޮޑު ލުޔެއް ލިބިގެންދާނެކަމަށް އިސްލާމިކް މިނިސްޓްރީން ބުންޏެވެ.
ރާއްޖޭގެ އެކިކަންކޮޅުތަކުގައި ޢިމާރާތްކުރަން ފަށާފައިވާ މިސްކިތްތަކުގެ މަސައްކަތުގެ ދުވެލި އަވަސްކޮށް ވީހާވެސް އަވަހަށް މަޝްރޫއުތައް ނިންމުމަށް އިސްލާމިކް މިނިސްޓްރީން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން ކުރިއަށް އޮތް ރަމަޟާން މަހުގެ ކުރިން 15މިސްކިތެއް ހުޅުވުމަށް އިސްލާމިކް މިނިސްޓްރީން ދަނީ ތައްޔާރުވަމުންނެެވެ.