
ސްރީލަންކާއަށް ކުރިމަތިވެފައިވާ ކާރިސާއިން އަރައިގަތުމަށް އެހީތެރިވުމުގެ ގޮތުން، ރާއްޖޭގެ މަޝްހޫރު ވިޔަފާރި ގްރޫޕެއް ކަމަށްވާ ސަން ސިޔާމް ގްރޫޕުން 200،000 އެމެރިކާ ޑޮލަރު (3 މިލިއަނަށް ވުރެ ގިނަ ރުފިޔާ) ގެ އެހީއެއް ވެދިނުމަށް ވައުދުވެއްޖެއެވެ.
މި އެހީގެ ފުރަތަމަ ބަޔެއްގެ ގޮތުގައި 75،000 ޑޮލަރު ވަނީ މިއަދު ހަވާލުކޮށްފައެވެ.
މި އެހީގެ ޗެކް ރަމްޒީ ގޮތުން ސްރީލަންކާގެ ހައި ކޮމިޝަނަރު މުޙައްމަދު ރިޒްވީ ހަސަންއާ ހަވާލުކުރެއްވީ ސަން ސިޔާމް ގްރޫޕްގެ ޗެއަރމަން އަޙްމަދު ސިޔާމް މުޙައްމަދެވެ. މިއީ ސްރީލަންކާގެ ރައްޔިތުންނަށް ދިމާވެފައިވާ ދަތިކަމުގައި އެހީތެރިކަމުގެ އަތެއް ދިއްކޮށްލުމަށް ސިޔާމް ގްރޫޕުން ކުރި މުހިންމު މަސައްކަތެކެވެ.
ވައުދުވެފައިވާ 200،000 ޑޮލަރުގެ އެހީގެ ތެރެއިން 75،000 ޑޮލަރުގެ ޗެކް ހަވާލުކުރައްވާފައިވާއިރު ސިޔާމް ވަނީ ވައުދުވެފައިވާ ބާކީ އެހީގެ ބައިތައް ވެސް ކުރިއަށް އޮތް ތަނުގައި ހަވާލުކުރާނެކަން ކަށަވަރުކޮށްދެއްވާފައެވެ.
މިފަދަ ދަނޑިވަޅެއްގައި ސަން ސިޔާމް ގްރޫޕް ފަދަ ބޮޑު ކުންފުންޏަކުން އެހީތެރިކަން ފޯރުކޮށްދިނުމަކީ ސްރީލަންކާގެ ރައްޔިތުންނަށް ލިބިގެންދިޔަ ވަރަށް ބޮޑު ހިތްހަމަޖެހުމަކާއި އެހީއެކެވެ.

