
ސްރީލަންކާ ސަރަހައްދުގައި އުފެދުނު ތޫފާން “ޑިޓުވާ”ގެ މިސްރާބު ރާއްޖެއާ ދުރަށް ދަތުރުކުރަމުންދާ ކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
ތޫފާން “ޑިޓުވާ”ގެ މިސްރާބު މިހާރު ހުރީ ހއ. ކެލާގެ އިރުއުތުރުން ގާތްގަނޑަކަށް 876 ކިލޯމީޓަރު ދުރުން ސްރީލަންކާގެ އުތުރު އައްސޭރި ފަށުގައި ކަމަށާއި ތޫފާން ދަތުރުކުރަމުންދާނީ ޓަމިލްނާޑޫ، ޕޮޑީޗެރީ އަދި އަންދްރަ ޕްރަދޭޝްގެ ދެކުނު އައްސޭރިފަށާ ދިމާއަށްކަމަށް މެޓް އޮފީހުން މަޢުލޫމާތުދެއެވެ.
މެޓް އޮފީހުން ބުނީ ކުރިއަށް އޮތް 24 ގަޑިއިރު ދެކުނާއި މެދުރާއްޖެތެރެއަށް ގުގުރުމާ އެކު ބޯކޮށް ވާރޭވެހޭނެ ކަމަށެވެ. އަދި ވިލާގަނޑުގައި 40 މޭލަށް ވައި ގަދަވާނެކަމަށް ވެސް ލަފާ ކުރެވޭކަމަށް ވެސް މެޓް އޮފީހުން ބުނެއެވެ. މޫސުން ރަނގަޅުވާނެކަމަށް ލަފާކުރެވެނީ އަންނަ އަންގާރަ ދުވަހުން (2 ޑިސެމްބަރު) ފެށިގެންކަމަށް މެޓް އޮފީހުން ބުނެއެވެ.
ލަންކާ ތޫފާނުގެ އަސަރެއް ރާއްޖެއަކަށް ނެތް، ބޯކޮށް ވާރޭވެހޭނެ:މެޓް
އެހެންކަމުން ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށާއި ސަލާމަތީ ގޮތުން ރައްކާތެރިކަމުގެ ފިޔަވަޅުތަކަށް ސަމާލުކަން ދިނުމަށް މެޓް އޮފީހާއި ދިފާއީ ބާރުން އިލްތިމާސްކުރެއެވެ. އަދި ކަނޑު ދަތުރުފަތުރުތަކުގައި ކޮންމެހެން ކުރަންޖެހޭ ދަތުރެއް ފިޔަވައި، އެހެން ދަތުރުތައް ނުކުރުމަށް ވެސް އެ ފަރާތްތަކުން އިލްތިމާސްކުރެއެވެ.

