
ހޮންގ ކޮންގްގެ ޓައި ޕޯގައި ހުންނަ ވަންގް ފުކް ޓަވަރުތަކުގައި ހިނގި އަލިފާނުގެ ޙާދިސާގައި މަރުވި މީހުންގެ ޢަދަދު 128އަށް އަރައިފިއެވެ.
މި ޓަވަރުތަކުގައި 32 ފަންގިފިލާގައި ގާތްގަނޑަކަށް 2،000 އެޕާޓްމަންޓުގައި 4،600އެއްހާ މީހުން ދިރިއުޅޭނެއެވެ. މި ޓަވަރުތަކުގެ 8 އިމާރާތުގެ ތެރެއިން 7 އިމާރާތަށް ފެތުރުނު އަލިފާނުގެ ހާދިސާގައި އަދިވެސް 200 މީހުންގެ ޚަބަރެއް ނުވާކަމަށާއި މަރުވި މީހުންގެ ޢަދަދު ދާނީ އިތުރުވަމުންކަމަށް އެ ގައުމުގެ މީޑިއާތަކުން ބުނެއެވެ.
މި އަލިފާނުގެ ޙާދިސާއާ ގުޅިގެން ހޮންގ ކޮންގް ފުލުހުން ވަނީ މިހާތަނަށް 11 މީހަކު ހައްޔަރުކޮށްފައެވެ. އޭގެ ތެރޭގައި ޓަވަރުތައް މަރާމާތު ކުރުމުގެ މަސައްކަތް ކުރަމުންދާ ކުންފުނިކަމަށްވާ، ޕްރެސްޓީޖް ކޮންސްޓްރަކްޝަންގެ ދެ ޑިރެކްޓަރުންނާއި އިންޖިނިއަރިންގ ކޮންސަލްޓަންޓެއް ހިމެނެއެވެ. އަދި ކޮރަޕްޝަންގެ ތުހުމަތުގައި 8 މީހަކު ހައްޔަރުކޮށްފައިވާ ކަމަށް އެ ގައުމުގެ ފުލުހުންނާ ހަވާލާދީ މީޑިއާތައް ބުނެއެވެ.
މި ހާދިސާގައި ސަލާމަތް ކުރެވުނު މީހުންނަށް ޞިއްޙީ އެހީތެރިކަން ފޯރުކޮށްދީ ވަގުތީ ބޯހިޔާވަހިކަމަށް ދަނީ ބަދަލުކުރަމުންނެވެ. އެ ގައުމުގެ ލީޑަރު ޖޯން ލީ ވަނީ މި ހާދިސާގައި ގެއްލުން ލިބުނު ފަރާތްތަކަށް 38.5 މިލިއަން އެމެރިކާ ޑޮލަރުގެ ފަންޑެއް ކަނޑައަޅައިފައެވެ.

