ރަނގަޅު ޢާއިލާއެއް ބިނާކުރެވޭނީ އިސްލާމީ ޢަޤީދާގެ މަތީގައި މުޅި ދިރިއުޅުން އާރާސްތުކުރެވިގެން ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެެވެ. ޚުޠުބާގައި ވިދާޅުވީ ހަރުދަނާ ޢާއިލާއެއް ބިނާކުރުމަށް، ދީނާއި ދުރު ފިކުރުތަކާއި ޢަމަލުތައް ގޭތެރޭގެ މާޙައުލުން ނައްތާލަންޖެހޭކަމަށެވެ.
ޚުޠުބާގައި ވިދާޅުވީ ޢާއިލާ ބަލިކަށިވެއްޖެނަމަ ދިރިއުޅުމުގެ ނިޒާމު ހަލާކުވެ، މުޖުތަމަޢުގައި އިންސާނިއްޔަތުކަން ނެތިދާނެކަމަށެވެ. ޢާއިލާއަކީ ލޯތްބާއި އޯގާތެރިކަމުގެ މައްޗަށް ބިނާވެފައިވާ ޝަރުޢީ އަދި އިޖުތިމާޢީ ހިޔާވަހިކަމެެއްކަމަށާއި، ހަރުދަނާ ޢާއިލާއެއް ބިނާކުރުމަކީ މާތް ﷲ ދެއްވި މިބޮޑު ނިޢުމަތަށް ޝުކުރުކުރުމަށް އެޅޭ ފުރަތަމަ ބިންގާކަމަށެވެ. ރަނގަޅު ޢާއިލާއެއް ބިނާކުރެވޭނީ އިސްލާމީ ޢަޤީދާގެ މަތީގައި މުޅި ދިރިއުޅުން އާރާސްތުކުރެވިގެންކަމަށްވެސް ޚުޠުބާގައި ވިދާޅުވިއެވެ.
ހަރުދަނާ ޢާއިލާއެއް ބިނާކުރެވޭނީ، ދީނާ ދުރު ފިކުރުތަކާއި ޢަމަލުތައް ގޭތެރޭގެ މާޙައުލުން ނައްތައިލެވިގެންނެވެ. އޭގެތެރޭގައި ދީނުގައި އަންގަވާފައިވާ މެދުމިނާއި ދުރު ފިކުރުތަކާއި، ދީނަށް ޢަމަލު ނުކުރުމާއި، ދީނީ ޝިޢާރުތަކަށް މަލާމާތްކޮށް ހަޖޫޖެހުން ފަދަ ކަންކަން ހިމެނެއެވެ. މިކަންކަން ޢާއިލާގެ ތެރެއިން ނައްތައިލައި، އިސްލާމް ދީނަކީ ޢަދުލުވެރި ދީންކަމާއި، މިދީނަކީ ދިރިއުޅުމުގެ ސީދާ މަގުކަން ދަރީންނަށް ވިސްނައިދީ ނަފްސުތަކުގައި މިކަންކަން ހަރުލައްވަންޖެހޭނެ ކަމަށްވެސް ވިދާޅުވިއެވެ.
ރަނގަޅު ޢާއިލާއެއް ބިނާކުރެވޭނީ ދަރީން ފުރާވަރަށް އެރުމުން ހުރިހާ ކަމެއް ހުއްދަވީކަމަށް ހީކުރާ ހީކުރުންތައް ދޫކޮށްލައިގެން ކަމަށާއި އުޅޭނެހައި ގޮތަކަށް އުޅެން ދަރީން ދޫކޮށް ނުލައި، އިސްލާމީ ޝަރީޢަތުގައި ކަނޑައަޅުއްވާފައިވާ އިމުން ބޭރުނުވެ، ޙަޔާތުގެ ބައިވެރިޔާ އިޚުތިޔާރުކުރުމަށް ދަރީންނަށް އިރުޝާދުދީގެން ކަމަށްވެސް ޚުތުބާގައި ވިދާޅުވިއެވެ.
މީގެ އިތުރުން އިސްލާމީ އުންމަތުގެ ކުރިމަގު އުޖާލާކޮށް އުންމަތުގެ ޢިއްޒަތާއި ކަރާމާތް އަލުން އަނބުރައި އިޢާދަކުރެވޭން އޮތީ، މާތްވެގެންވާ އިސްލާމްދީނުގެ ތަޢުލީމާއި ތަރުބިޔަތުގެ ހިޔަލުގައި، ޢާއިލާ ބައްޓަންކޮށްގެން ކަަމަށް ޚުތުބާގައި ވިދާޅުވިއެވެ.
“ކޮންމެ މަޔަކާއި ބަފަޔަކު، ދަރީން ތަރުބިޔަތުކުރުމުގައި އިސްލާމް ދީން ގެނެސްދީފައިވާ މަންހަޖާ އެއް ގޮތަށް ޢަމަލުކުރުމަކީ، މިއަދު ކުރަންޖެހިފައިވާ އެންމެ މުހިންމު މަސައްކަތެއް. ހަރުދަނާ ޢާއިލާއެއް ބިނާކުރެވޭނީ اللّٰهގެ އަމުރުފުޅުތަކަށް ފުރިހަމައަށް ކިޔަމަންވެ އިސްލާމީ ޝިޢާރުތަކަށް މާތްކޮށް ހިތުމަށް ދަރީންނަށް ދަސްކޮށްދީގެން” ހުކުރު ޚުތުބާގައި ވިދާޅުވިއެވެ.
އިސްލާމީ ޙުކުމްތަކަކީ ރަމްޒީ އެއްޗެއް ނޫންކަމާއި، އެއީ އެއަށް ޢަމަލުކުރާންޖެހޭ ޙުކުމްތަކެއްކަން އެންމެ ކުޑައިރުން ފެށިގެން ވެސް ދަރީންނަށް ދަސްކޮށްދޭން ޖެހޭކަމަށް ޚުތުބާގައި ވިދާޅުވިއެވެ. ފަސާދަޔާއި މަގުފުރެދުމާއި، ބައިބައިވުމާއި ހަމަނުޖެހުންތަކުން އިސްލާމީ އުންމަތް ސަލާމަތްކުރުމަށްޓަކައި ހަރުދަނާ ޢަޤީދާގެ މަތީގައި ދަރީން ތަރުބިޔަތުކުރަން ވަރަށްބޮޑު އިސްކަމެއް ދޭން ޖެހެއެވެ. ދަރީންގެ ހިތްތަކުގައި އީމާންކަމުގެ އޮށް އިންދައި ތައުޙީދުގެ ޢިލްމު އުނގަންނައިދިނުމަކީ، ހަރުދަނާ ތަރުބިޔަތާއި ޢިލްމުތަކުގެ ކުރިބޯއްޓަށް ދަރީން ވާޞިލުކޮށްދިނުމަށްޓަކައި ހުޅުވޭނެ އަމާން ދޮރެކެވެ.
ޢާއިލާގެ ކޮންމެ ފަރުދަކުވެސް ހެޔޮކަންކަމަށް އަމުރުކޮށް ނުބައިކަންކަން މަނާކުރުމަކީ އަދާކުރާންޖެހޭ ޒިންމާއެއްކަމާއި، ދަރީންނަށް ތަޢުލީމުދީ، ބަލައިބޮޑުކުރުމުގައި އިހުމާލުނުވުމަށާއި، ފަރުވާކުޑަނުކުރުމަށް ޚުތުބާގައި ވިދާޅުވިއެވެ. އަދި ދުނިޔެވީ ތަޢުލީމާ އެކުއެކީ އުޚުރަވީ ތަޢުލީމަށް ދަރީންގެ ހިތްތަކުގައި ލޯބިޖައްސައި، އަހުލުވެރިކުރުމާއި، ދީނާ ދުރު ކަންކަން ގޭތެރޭގެ މާޙައުލުން ނައްތައިލައި، ދަރީންގެ ޢުމުރާ ގުޅޭ ގޮތުން ދީނީ މަޢުލޫމާތު، ޒަމާނީ ވަސީލަތްތައް ބޭނުންކޮށްގެން ދަރީންނަށް ފޯރުކޮށްދިނުމަށް ޚުތުބާގައި ވަނީ އިލްތިމާސް ކުރައްވާފައެވެ.