ސަޢޫދީ އަރަމްކޯގެ ހެލިކޮޕްޓަރެއް ވެއްޓި ބަޔަކު މަރުވި ހިތާމަވެރި ހާދިސާއާ ގުޅިގެން، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސަޢޫދީ ޢަރަބިއްޔާގެ ވަލީޢަހުދު އަދި ބޮޑުވަޒީރު އަމީރު މުޙައްމަދު ބިން ސަލްމާނަށް ތަޢުޒިޔާގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާ ފޮނުއްވި މި މެސެޖުގައި ބަޔާންކުރައްވާފައިވާ ގޮތުގައި، އެތައް ބައެއްގެ ފުރާނަ ގެއްލިގެން ދިޔަ މި ހިތާމަވެރި ޚަބަރު އެއްސެވީ ނުހަނު ފުން އަސަރަކާ އެކުގައެވެ. އަދި މުޅި ދިވެހި ދައުލަތާއި، ރައްޔިތުންނާއި، އެ މަނިކުފާނުގެ އަމިއްލަ ނަންފުޅުގައި ސަޢޫދީ ސަރުކާރަށާއި އެ ޤައުމުގެ އާންމު ރައްޔިތުންނަށް ވަނީ އިޚްލާޞްތެރިކަމާ އެކު ހަމްދަރުދީ ފާޅުކުރައްވާފައެވެ.
މިފަދަ ހިތްދަތި އުނދަގޫ ވަގުތެއްގައި ސަޢޫދީ ޢަރަބިއްޔާގެ ރައްޔިތުންނާ އެކު ދިވެހިން އަބަދުވެސް ސާބިތުކަންމަތީ ތިބޭނެކަމުގެ ފުރިހަމަ ޔަޤީންކަން ރައީސް ދެއްވިއެވެ. މީގެ އިތުރުން، މި ހާދިސާގެ ސަބަބުން ވަކިވެދިޔަ ފަރާތްތަކުގެ އާއިލާތަކަށް ކެތްތެރިކަން މިންވަރުކޮށްދެއްވުން އެދި މާތްﷲގެ ޙަޟްރަތުގައި ދުޢާ ދަންނަވައި، އެ އާއިލާތަކުގެ ހިތާމައިގައި ބައިވެރިވެވަޑައިގަންނަވާކަން މެސެޖު ނިންމަވާލައްވަމުން ހާމަކުރައްވާފައިވެއެވެ.