ވިލިމާލޭގައި ހިންގާ އުމްރާނީ ތަރައްޤީގެ އެންމެހާ މަޝްރޫޢުތައް ކުރިއަށް ގެންދާނީ އެރަށުގެ ޤުދުރަތީ ރީތިކަމާއި ފެހިކަން އެގޮތުގައި ދަމަހައްޓައިގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ތިމާވެށި ރައްކާތެރިކުރުމުގެ ސިޔާސަތުގެ ދަށުން، ވިލިމާލޭގައި އިމާރާތްކުރުމަށް ހަމަޖެހިފައިވާ ބޯހިޔާވަހިކަމުގެ މަޝްރޫޢުގެ ސަބަބުން ބޮޑެތި ގަސްތަކެއް ކަނޑާލަން ޖެހުމާ އެކު، އެ މަސައްކަތް ކުރާ ސަރަޙައްދު މިހާރު ބަދަލުކޮށްފައިވާކަން އެމަނިކުފާނު ފާހަގަކުރެއްވިއެވެ. މީގެ އިތުރުން، އެ އަވަށުގައި ޤާއިމުކުރާ އައު ހޮސްޕިޓަލުގެ މަސައްކަތަށް ބައެއް ގަސްތައް ނަގަން މަޖުބޫރުވި ނަމަވެސް، އޭގެ ބަދަލުގައި އެހެން ސަރަޙައްދުތަކުގައި ގަސް އިންދައި އާލާކުރެވޭނެކަމުގެ ޔަޤީންކަން ރައީސް ދެއްވިއެވެ.
މާލެއާ ގުޅިފައި އޮންނަ ވިލިމާލެއަކީ ޒަމާނުއްސުރެ ލިބިފައިވާ ފެހިކަމުގެ ސިފަ ގެއްލުނަ ނުދީ، އައު އާބާދީއާ ގުޅޭގޮތަށް ތަރައްޤީ ކުރަންޖެހޭ ތަނެއްކަމަށް އެމަނިކުފާނު ވިދާޅުވިއެވެ. ދިވެހިރާއްޖެއިން ތަރައްޤީގެ އަމާޒުތަކަށް ވާސިލުވާއިރު، ތިމާވެށި ހިމާޔަތްކުރުމުގައި ބައިނަލްއަޤުވާމީ މުޖުތަމަޢަށް ނަމޫނާ ޤައުމަކަށް ވުމަކީ ސަރުކާރުގެ ވަރަށް ބޮޑު ތަސައްވުރެއްކަމަށް ވެސް ރައީސް ވިދާޅުވިއެވެ.
މި އަމާޒަށް ވާސިލުވުމަށްޓަކައި މުޅި ރާއްޖޭގައި ފަސް މިލިއަން ގަސް އިންދުމަށް ފަށާފައިވާ ޤައުމީ ހަރަކާތް ކާމިޔާބުކަމާ އެކު ތާވަލާ އެއްގޮތަށް ކުރިއަށްދާކަން ރައީސް އިއުލާންކުރެއްވިއެވެ. މިއީ ރައްޔިތުންގެ ފުރިހަމަ ބައިވެރިވުމާއި އެއްބާރުލުން ބޭނުންވާކަމެއްކަން އެމަނިކުފާނު ތަކުރާރު ކުރެއްވިއެވެ.
ސަރުކާރުގެ ފަސް އަހަރުގެ ދައުރުގެ ތެރޭގައި ފަސް މިލިއަން ގަސް އިންދުމަށް ރައީސް މުޢިއްޒު ވެވަޑައިގެންފައިވާ ރިޔާސީ ވައުދުގެ ދަށުން މިހާތަނަށް 1.6 މިލިއަނަށްވުރެ ގިނަ ގަސް ވަނީ ރާއްޖޭގެ އެކި ކަންކޮޅުތަކުގައި އިންދާފައެވެ. މި މުހިންމު މަޝްރޫޢު ރަސްމީކޮށް އިފްތިތާހުކޮށްފައި ވަނީ 2024ވަނަ އަހަރުގެ ދުނިޔޭގެ ތިމާވެށީގެ ދުވަސް ކަމަށްވާ ޖޫން މަހުގެ 5ވަނަ ދުވަހުއެވެ.