އިނގިރޭސިވިލާތުގެ މަޝްހޫރު ފުޓްބޯޅަ ކްލަބު، ލިވަޕޫލް ފުޓްބޯލް ކްލަބް (އެލްއެފްސީ) ގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރެއްގެ ގޮތުގައި ރާއްޖެ އިޝްތިހާރު ކުރުމުގެ ކެމްޕެއިން ރަސްމީކޮށް ފަށައިފި އެވެ.
ޔޫއެފާ ޗެމްޕިއަންސް ލީގު ހަ ފަހަރު އަދި އިނގިރޭސި ލީގު ދެ ވަނައަށް އެންމެ ގިނައިން ކާމިޔާބުކޮށްފައިވާ ލިވަޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރުގެ ގޮތުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަދި ވިޒިޓް މޯލްޑިވްސްއިން ޕާޓްނާޝިޕް އިއުލާނުކުރީ މިދިޔަ މާޗް މަހުގެ 13 ވަނަ ދުވަހު އެވެ.
ލިވަޕޫލްގެ ސްޓޭޑިއަމް، އެންފީލްޑްގައި ރޭ އެ ކްލަބުން އެވަޓަން އާ ބައްދަލުކުރި މެޗުގައި ރާއްޖޭގެ ޓޫރިޒަމް ޕްރޮމޯޓްކުރުމުގެ ކެމްޕެއިން ވަނީ ރަސްމީކޮށް ފަށާފަ އެވެ. ކެމްޕެއިން ފެށި ރަސްމިއްޔާތުގައި ރައީސް ޑރ. މުހައްމަދު މުއިއްޒު ބައިވެރިވެ ވަޑައިގެންނެވި އެވެ.
H.E. President Dr @MMuizzu attends the Liverpool FC vs Everton, the Merseyside derby on Wednesday evening, marking the historic kick-off of the Maldives tourism promotion campaign in collaboration with Liverpool Football Club as part of a co-branded initiative between @LFC and… pic.twitter.com/lMdqciDlXg
— The President's Office (@presidencymv) April 2, 2025
ލިވަޕޫލް އާއެކު އެކުލަވާލި ޕާޓްނާޝިޕްގެ ދަށުން ތިން އަހަރާއި ހަ މަސް ދުވަހުގެ ބައިނަލްއަގުވާމީ ކެމްޕެއިނެއް ކުރިއަށް ގެންދާނެ އެވެ. މި ކެމްޕެއިނުގެ ދަށުން ބްރޭންޑް ވާސިލުވާ މިންވަރު އިތުރުކުރުމާއި ރާއްޖެ އަންނަ ޓޫރިސްޓުންގެ އަދަދު އިތުރުކުރުމުގެ އިތުރުން ރާއްޖެއަށް މުހިންމު އިގުތިސޯދީ މަންފާތައް ހޯދޭނެ މަގުފަހިވެގެންދާނެ އެވެ.
ޕާޓްނާޝިޕްގެ ދަށުން މިިދިޔަ ބުރާސްފަތި ދުވަހު ވިޒިޓް މޯލްޑިވްސްއިން ވަނީ އިނގިރޭސިވިލާތުގައި ފުޅާ ދާއިރާއެއްގައި އައުޓްޑޯ ކެމްޕެއިނެއް ފަށާފަ އެވެ. ތިން މަސް ދުވަހުގެ މި ކެމްޕެއިނުގެ ދަށުން އިނގިރޭސިވިލާތުގެ މުހިންމު ބައެއް ސަރަހައްދުތަކުގައި އައުޓްޑޯ އަދި ޑިޖިޓަލް އެޑްވަޓައިޒިންގެ މަސައްކަތްތައް ކުރިއަށް ގެންދިއުމަށް ވަނީ ހަމަޖެހިފަ އެވެ. އެގޮތުން ލަންޑަންގެ 100 ޓެކްސީއެއްގަ އާއި ބަސްތަކާއި ލަންޑަން އަންޑަގްރައުންޑާއި އެއާޕޯޓުތަކާ އަދި ބިޒްނަސް ކްލާސް ލައުންޖުތަކުގައި ވިޒިޓް މޯލްޑިވްސް ބްރޭންޑް ގިނަ އަދަދެއްގެ ބަޔަކަށް އިޝްތިހާރު ކުރެވިގެންދާނެ އެވެ.
އޭގެ އިތުރުން ޕްރިމިއާ ލީގް މެޗުތައް އެންފީލްޑްގައި ކުޅޭ ދުވަސްތަކުގައި ސްޓޭޑިއަމްގައި ލެޑް ސައިނޭޖް ދައްކައި، ލިވަޕޫލްގެ ރަސްމީ ލުއިފޮތްތަކާއި ޔޫރަޕުގެ އެކި ސަރަހައްދުތަކުގައި ހުންނަ ބިލްބޯޑުތަކުގައި ރާއްޖޭގެ ބްރޭންޑް އިޝްތިހާރުކޮށް، ބައިނަލްއަގުވާމީ ފެންވަރެއްގައި ޓޫރިޒަމް ކުރިއަރުވަން މަސައްކަތްކުރާނެ އެވެ.
މި ކެމްޕެއިން ފެއްޓެވުމަށް އިނގިރޭސިވިލާތަށް ރައީސް ކުރައްވާ ދަތުރުފުޅުގައި ޓޫރިޒަމް އެންޑް އެންވަޔަރަންމަންޓް މިނިސްޓަރު ތޯރިގު އިބްރާހީމާއި ސްޕޯޓްސް ފިޓްނަސް އެންޑް ރެކްރިއޭޝަން މިނިސްޓަރު އަބްދުﷲ ރާފިއު އާއި އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީގެ އިތުރުން ސަރުކާރުގެ ބައެއް އިސްވެރިން ބައިވެރިވެ ވަޑައިގަންނަވަ އެވެ.