ކްރިއޭޓިވް ނެޓްވޯކްގެ ކްރައިމް ތްރިލާ ސީރީޒް ‘ޖުންޖުލާ’ ގެ ހަތަރު އެޕިސޯޑް މިހާރު ވީޑިއޯ ކްލަބުން ސްޓްރީމް ކުރަމުން އަންނައިރު، ތިން ވަނަ އެޕިސޯޑް، “އިއުތިރާފް” ވެގެން ގޮސްފައިވަނީ ގިނަ ބައެއްގެ މެދުގައި މަޤްބޫލު އެޕިސޯޑަކަށެވެ.
އެޕިސޯޑް ފެށިގެން އަންނަނީ އަނިޔާވެރި ރެއަކަށްފަހު ޖެހިގެން އައި ދުވަހުގެ ހެނދުނުންނެވެ. ނަހުދާ (މަރިޔަމް ޝިފާ) ސުޕްރިންޓެންޑެންޓް އޮފް ޕޮލިސް ޒާރާ ކަރީމް (ވަޝީޔާ މުޙައްމަދު) ގެ ކުރިމަތީގައި ތަހުގީގުކުރާ ކޮޓަރީގައި އިނދެ، އޭނާގެ ފިރިމީހާ ޖިލްވާޒަށް (އަލީ އާޒިމް، ދޮން އައްޔަ) ހަމަލާދިންކަމަށް ވަރަށް ހަމަޖެހިލައިގެން އިނދެ އިއުތިރާފުވެއެވެ.
ކަރުދާހުގައި އޮތް ގޮތުންނަމަ މިއީ ވަރަށް ސާފު މައްސަލައެކެވެ. އަނިޔާ ލިބުނު މީހަކާއި، ކުށްކުރި ތަނަކާއި، އަދި ބަޔާނުގައި ސޮއިކުރަން ތައްޔާރަށް އިން އަނތްބަކު އެބައިނެވެ. ނަމަވެސް ޒާރާ މިކަމުގައި އަވަސްވެގަންނާކަށް ބޭނުމެއް ނުވެއެވެ. އޭނާ އަމިއްލައަށް އެޕާޓްމަންޓަށް ގޮސް، ފާޚާނާއާއި ތަރުތީބުކުރެވިފައިވާ ނިދާ ކޮޓަރި ބަލައި ފާސްކުރާއިރު، އޭނާއަށް ކިޔައިދެމުންދާ ސާފު ވާހަކައާ ނުގުޅޭ ކުދިކުދި ތަފްސީލުތަކެއް ފާހަގަވެއެވެ.
އިންޓަވިއު ކުރިއަށްދާ ވަރަކަށް، މި ހާދިސާ ހިނގުމުގެ ކުރިން ހޭދަވި ގަޑިތަކަށް އެޕިސޯޑްގެ މަންޒަރުތައް ބަދަލުވެގެންދެއެވެ. އަދި އޭގެވެސް ކުރިއަށް ގޮސް، އޭގެ އެއް އަހަރު ކުރިން އެ ދެމަފިރިންގެ ކައިވެންޏަށްވެސް މަންޒަރު ބަދަލުވެއެވެ. އުފާވެރިކަމާއެކު ފެށުނު އެ ކައިވެނި މަޑުމަޑުން ފިނިވެގެންދިޔަ ގޮތް ފެނިގެންދެއެވެ. މި ފްލެޝްބެކްތަކުގެ ސަބަބުން އެރޭގެ މަންޒަރު ފެންނަ ގޮތް ބަދަލުވެއެވެ: އެ ދެބަސްވުމާއި، އެކަން ޖިސްމާނީ އަނިޔާއަކަށް ބަދަލުވި ހިނދުކޮޅާއި، އަދި ހަގީގަތުގައި ނުރައްކާ އޮތީ ކާކުގެ ފަރާތުން ކާކަށްތޯ އުފެދޭ ސުވާލެވެ.
އެޕިސޯޑް ނިމޭއިރު، ހަގީގީ ސިއްރަކީ ނަހުދާ އެކަން ކުރިތޯ ނުވަތަ ނޫންތޯއެއް ނޫނެވެ. އޭގެ ބަދަލުގައި އުފެދޭ ސުވާލަކީ، މުޅި ހަގީގަތް ފޮރުވުމަށްޓަކައި އޭނާ ބުނަން ތައްޔާރަށް އޮތީ ކީކޭތޯ އަދި އެއީ ކީއްވެގެންތޯއެވެ.
‘ޖުންޖުލާ’ އަކީ ކްރިއޭޓިވް ނެޓްވޯކްގެ ފީޗާ ފިލްމު ‘ލިލީ’ ވެސް ޑައިރެކްޓްކުރި އަޒްހާން އިބްރާހިމް ޑައިރެކްޓްކޮށްފައިވާ 10 އެޕިސޯޑުގެ ދިވެހި ކްރައިމް ސީރީޒެކެވެ. ކޮންމެ އެޕިސޯޑެއްގައިމެ ވަކި މައްސަލައެއް ގެނެސްދޭއިރު، ޒާރާގެ އަމިއްލަ ސިއްރު މާޒީ މަޑުމަޑުން ހާމަވަމުންދެއެވެ. މި ސީރީޒް ވީޑިއޯކްލަބްގައި ޕްރިމިއާ ކޮށްފައިވަނީ އޮކްޓޯބަރު 3 ވަނަ ދުވަހު “ފަހު ފިލާވަޅު” އަދި “މުކައްޒިބީން” އާއެކުގައެވެ. ކޮންމެ ހަފްތާއަކު އާ އެޕިސޯޑެއް ނެރެއެވެ.
ހަތަރުވަނަ އެޕިސޯޑް “ހިމޭން ހެކި” އެވެ. ޖުންޖުލާ މިހާރު ވީޑިއޯކްލަބުން ސްޓްރީމް ކުރެވެމުންދެއެވެ.