ވެކްސިން ދިނުމުގެ ޚާއްޞަ ހަރަކާތްތަކާ އެކު ފާއިތުވި ދެ މަހެއްހާ ދުވަހުގެ ތެރޭގައި މާލެ ސަރަހައްދުގައި ހިމަބިހި ފެތުރެމުންދިޔަ މިންވަރު ވަރަށް ބޮޑަށް ދަށްވެއްޖެކަން ހާމަވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ ޖުލައި މަހާ އަޅާބަލާއިރު އޮގަސްޓު މަހު ބަލިޖެހުނު މީހުންގެ އަދަދު ވަނީ ފާހަގަކުރެވޭ މިންވަރަކަށް މަދުވެފައެވެ. އެގޮތުން، ނިމިދިޔަ ހަފުތާގައި މާލެ ސަރަހައްދުން މި ބައްޔަށް ޕޮޒިޓިވްވެފައި ވަނީ އެންމެ 9 މީހުން ކަމަށްވާއިރު، މިއީ ފަހުގެ ތާރީޚެއްގައި އެންމެ މަދުން ކޭސް ރިޕޯޓުކުރެވުނު ހަފުތާއެވެ. ޖުލައި މަހުގެ ފުރަތަމަ ހަފުތާގައި އެކަނި ވެސް 55 މީހުންނަށް ބަލިޖެހި، މުޅި އެ މަހު ކޮންމެ ހަފުތާ އަކު 20 އަށްވުރެ ގިނަ މީހުން ޕޮޒިޓިވްވެފައިވީ ނަމަވެސް، އޮގަސްޓު މަހު އެ އަދަދުތައް ވަނީ ދަށްވާން ފަށާފައެވެ. މިއަހަރުގެ މިހާތަނަށް ޖުމްލަ 252 މީހަކަށް ހިމަބިހި ޖެހިފައިވާކަމަށް ރެކޯޑުކުރެވިފައިވެއެވެ.
ރާއްޖެއިން މުޅިން ނައްތާލެވިފައިވާ ބައްޔެއްގެ ގޮތުގައި ކަނޑައަޅާފައިވަނިކޮށް، އަލުން މި ބަލީގެ ކޭސްއެއް ފެނިފައި ވަނީ މިއަހަރުގެ މެއި މަހުގެ ތެރޭގައެވެ. އެއާއެކު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ މިންގަނޑުތަކާ އެއްގޮތަށް އެޗްޕީއޭއިން ވަނީ ހަރުދަނާ ފިޔަވަޅުތަކެއް އަޅަން ފަށާފައެވެ. ބަލި ޖެހޭ މީހުން ދެނެގަނެ، ކޮންޓެކްޓް ޓްރޭސިންގ ހެދުމުގެ އިތުރުން ފުޅާ ދާއިރާއެއްގައި ވެކްސިން ދިނުމުގެ ކެމްޕޭނެއް ފަށައި، މިހާތަނަށް 15،552 މީހުންނަށް ވަނީ ވެކްސިން ދީފައެވެ.
ބަލި ފެތުރޭ މިންވަރު މަދުވި ނަމަވެސް، މިއީ ހަލުވިކަމާ އެކު ގައިންގަޔަށް އަރާ ބައްޔަކަށްވާތީ ރައްކާތެރިކަމުގެ ފިޔަވަޅުތައް ދެމެހެއްޓުމަށް ސިއްހީ މާހިރުން ލަފާދެއްވައެވެ. ހުމާއި ރޯގާގެ އަލާމާތްތައް ފެންނަނަމަ މީހުންނާ އެކަހެރިވުމަށާއި، ގައިގައި ރަތްކުލައިގެ ބިހިތަކެއް ނަގާނަމަ ލަސްނުކޮށް ޑޮކްޓަރަށް ދެއްކުމަށް އެޗްޕީއޭއިން އިލްތިމާސްކުރެއެވެ. އަދި ފަރުވާ ހޯދުމަށް ހޮސްޕިޓަލަށް ނުވަތަ ކްލިނިކަށް ދާއިރު މާސްކު އެޅުމަކީ ވެސް އެހެން މީހުންނަށް ބަލި ފެތުރުން ހުއްޓުވުމަށް އެޅޭނެ މުހިންމު ފިޔަވަޅެއްކަމަށް އެ އިދާރާއިން ފާހަގަކުރެއެވެ.