ޖިނާއީ ބޮޑެތި ކުށްތަކުގެ ތެރެއިން ޣައިރު ޤާނޫނީ ގޮތުން މީހުން ހޯދާފައިވާ މުދަލާއި ފައިސާ ދައުލަތަށް ނެގުމުގެ ޚާއްޞަ ޤާނޫނީ އޮނިގަނޑެއް އެކަށައަޅައި، ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ހުށަހަޅައިފިކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރައްވައިފިއެވެ.
ރައީސް މުޢިއްޒު މީސްމީޑިއާ މަންސަ ‘އެކްސް’ ގައި ކުރެއްވި ޕޯސްޓެއްގައި ބަޔާންކުރައްވާފައިވާ ގޮތުން، މި އައު ބިލުގެ އެންމެ ބޮޑު އަމާޒަކީ ކުށްވެރިން ނުޙައްޤުން ޖަމާކުރާ މުދާ އަތުލައި، އެއިން އިތުރު މަންފާއެއް ހޯދުމަށް އޮންނަ މަގުތައް އެއްކޮށް ބަންދުކުރުމެވެ. މި ބިލު ޤާނޫނަކަށް ވުމުން، ދައުލަތުގެ މުދަލަށް ޚިޔާނާތްތެރިވެގެންނާއި އެހެނިހެން ބޮޑެތި ކުށްތަކުން މާލީ ފައިދާ ހޯދުން ހުއްޓުވި، މިހާރު ޤާނޫނީ ގޮތުން ކުރިމަތިވަމުންދާ ގޮންޖެހުންތަކަށް ފުރިހަމަ ޙައްލެއް ލިބިގެންދާނެކަމަށް އެ މަނިކުފާނު ފާހަގަކުރެއްވިއެވެ.
ކުށް ކޮށްގެން ހޯދާ މުދަލާގުޅޭ ބިލެއް އެކުލަވާލައި ސަރުކާރުގެ ފަރާތުން ރައްޔިތުންގެ މަޖިލީހަށް މިއަދު ވާނީ ފޮނުވާފައި.
މި ބިލު ހުށަހެޅުމުގެ މައިގަނޑު އެއް ބޭނުމަކީ، ޖިނާއީ ބޮޑެތި ކުށްތައް ކުރާ ފަރާތްތަކުން ނުޙައްޤުން ހޯދާ މުދާ އެ ފަރާތްތަކުގެ ކިބައިން ނަގައި، އެ މުދަލުން އިތުރު…
— Dr Mohamed Muizzu (@MMuizzu) August 25, 2026
މިފަދަ ޤާނޫނެއްގެ މުހިންމުކަން ބޮޑުވެފައިވާއިރު، އެންޓި ކޮރަޕްޝަން ކޮމިޝަން (އޭސީސީ)އިން ދާދިފަހުން އާންމުކުރި ދިރާސާއަކުން ވެސް ވަނީ ނުޙައްޤު މުދާ ދައުލަތަށް ނެގުމުގައި ބޮޑެތި ހުރަސްތަކެއް ހުރިކަން ހާމަވެފައެވެ. މިހާތަނަށް އަމަލުކުރަމުން އަންނަ ގޮތުން، ކުށްކޮށްގެން ހޯދާ ފައިސާ އަތުލެވެން އޮންނަނީ ހަމައެކަނި މަނީ ލޯންޑަރިންގ އަދި ކޮރަޕްޝަންގެ މައްސަލަތަކުގައި އެކަނި ނަމަވެސް، މި ބިލާ އެކު އެކަމަށް ފުޅާ ދާއިރާއެއްގައި ދާއިމީ ޙައްލެއް ލިބިގެންދާނެއެވެ.
ސަރުކާރުން މި މުހިންމު ބިލު ޤާނޫނުހަދާ މަޖިލީހަށް ފޮނުވާފައިވީ ނަމަވެސް، މި ބިލުގެ މަސައްކަތްތައް ފެށިގެންދާނީ މަޖިލީހުގެ މި ހިނގާ ޗުއްޓީ ނިމި، އަލުން ޖަލްސާތައް ފެށުމުން ކަމަށް ބެލެވެއެވެ.