ޤައުމީ އެއަރލައިން، މޯލްޑިވިއަން ސީޕްލޭންގެ ޚިދުމަތް އިތުރަށް ފުޅާކޮށް، އައު މަންޒިލްތަކަށް ދަތުރުތައް ފެށުމާ އެކު ޚާއްސަ ޓަރމިނަލެއް ތަރައްޤީކުރުމުގެ މަސައްކަތް އެ ކުންފުނިން ފަށައިފިއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ، ރާއްޖޭގެ ފަތުރުވެރިކަމުގެ ސިނާޢަތަށް އެހީތެރިކަން ފޯރުކޮށްދިނުމަކީ ކުންފުނީގެ ވިޔަފާރިއަށާއި މުޅި ޤައުމުގެ އިޤްތިޞާދަށް ވެސް ނުހަނު ބޭނުންތެރި ކަމެއް ކަމަށެވެ. އެގޮތުން، މިހާރު ބޭނުންކުރަމުންދާ 11 ސީޕްލޭންގެ ފްލީޓު ބޮޑުކުރުމުގެ އިތުރުން، ބޮޑެތި ރިސޯޓު ބްރޭންޑުތަކާ އެކު ދަތުރުފަތުރުގެ އެއްބަސްވުންތައް ޤާއިމުކުރުމުގެ މަޝްވަރާތައް މިހާރު ވެސް ކުރިއަށްދާކަން އޭނާ ފާހަގަކުރެއްވިއެވެ.
ފަސިންޖަރުންނަށް ދެވޭ ޚިދުމަތުގެ ފެންވަރު މަތިކުރުމުގެ ގޮތުން، މޯލްޑިވިއަނުން ކުރިން ބޭނުންކުރި ސީޕްލޭން ޓަރމިނަލް ހުރި ސަރަޙައްދުގައި މުޅިން އައު، ޒަމާނީ ފެސިލިޓީއެއް އިމާރާތްކުރުމުގެ މަސައްކަތް ވެސް ދަނީ ކުރަމުންނެވެ. ސަލީމް ވިދާޅުވި ގޮތުގައި ވަރަށް އަވަސް މުސްތަޤުބަލެއްގައި މިތަން ހުޅުވި، ވިޔަފާރިވެރިންނާއި ކަސްޓަމަރުންނަށް ފެންވަރު ރަނގަޅު ޚިދުމަތްތަކެއް ލިބިގެންދާނެއެވެ.
އޮޕަރޭޝަންތައް ފުޅާކުރުމަށްޓަކައި މޯލްޑިވިއަނުން ވަނީ މި މަހުގެ 11ވަނަ ދުވަހު ކެނެޑާގެ ޑި ހެވިލަންޑް ކުންފުންޏާ އެކު އައު ބޯޓުތަކެއް ގަތުމުގެ މުހިންމު އެއްބަސްވުމެއްގައި ސޮއިކޮށްފައެވެ. މި ފަހުމުނާމާގެ ދަށުން އެ ކުންފުނިން ގެނައުމަށް ހަމަޖެހިފައި ވަނީ، ދިވެހިރާއްޖޭގެ ޖައްވަށް އެންމެ އެކަށީގެންވާ ގޮތަށް ފަރުމާކޮށްފައިވާ، އަދި ބަލަހައްޓަން ފަސޭހަ ޒަމާނީ އޭވިއޯނިކްސް ސިސްޓަމްތައް ހިމެނޭ ‘ޑީއެޗްސީ-6 ޓްވިން އޮޓަރ ކްލަސިކް 300-ޖީ’ މަރުކާގެ ދެ ބޯޓެވެ. މިއާ އެކު މޯލްޑިވިއަންގެ ސީޕްލޭން ނެޓްވޯކް ކުރިއަށް އޮތް ތަނުގައި ފެނިގެންދާނީ ވަރަށް ކާމިޔާބު، އަދި އިތުބާރު ހިފޭ އޮޕަރޭޝަނެއްގެ ގޮތުގައިކަމަށް އެ ކުންފުނިން ޔަޤީންކުރެއެވެ.