އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ރާއްޖޭގެ އެކި ކަންކޮޅުތަކުގައި ހިންގާ ހުރިހާ ފިހާރަތަކެއް “އަގުމަގު” ޕޯޓަލްގައި ބައިވެރިވުމުގެ ފުރުޞަތު މިއަދު ހުޅުވާލައިފިއެވެ.
މި އަހަރުގެ ފެބުރުވަރީ މަހުގެ 28ވަނަ ދުވަހު ތަޢާރަފުކުރި މި ޕޯޓަލް މެދުވެރިކޮށް ކުރިން ފެންނަން ހުންނަނީ ހަމައެކަނި މާލެ ސަރަޙައްދުގެ ފިހާރަތަކުގެ އަގުތައް ނަމަވެސް، އަލަށް ނެރުނު މޯބައިލް އެޕްލިކޭޝަނާ އެކު އަތޮޅުތެރޭގެ ވިޔަފާރިތަކަށް ވެސް މިހާރު ވަނީ މި ޕްލެޓްފޯމާ ގުޅުމުގެ މަގުފަހިވެފައެވެ. ސޯޝަލް މީޑިއާގައި އެ ވުޒާރާއިން ޢާއްމުކުރި މަޢުލޫމާތުގައިވާ ގޮތުން، ވިޔަފާރިވެރިންނަށް މި ޕޯޓަލްގައި ރަޖިސްޓަރީވުމަށް ކިޔުއާރު ކޯޑެއް ސްކޭންކޮށްލުމުން ނުވަތަ agumagu.trade.gov.mv އަށް ވަދެގެން ފަސޭހަކަމާ އެކު އެކަން ކުރިއަށް ގެންދެވޭނެއެވެ. މީގެ ސަބަބުން، މުޅި ރާއްޖޭގެ އެކި ހިސާބުތަކުން ވިޔަފާރިކުރާ އެތައް ހާސް ބަޔަކަށް ފިހާރަތަކުގައި ހުރި މުދަލުގެ އަގުތަކާއި ސްޓޮކް ހުރި ނެތް ގޮތް ވަގުތުން ބަލައިލެވޭނެއެވެ.
“އަގުމަގު” އެޕްލިކޭޝަނަކީ ކޮންމެ ދުވަހަކު އާންމުން ބޭނުންކުރާ ތަކެތީގެ އެންމެ ފަހުގެ އަގުތައް އެއް ތަނަކުން ފެންނާނެހެން ފަރުމާކޮށްފައިވާ ޒަމާނީ ވަސީލަތެކެވެ. އެގޮތުން ބާޒާރުގައި ތަކެތި ވިއްކަން ހުރި އެންމެ ހެޔޮ އަގާއި، އެންމެ ބޮޑު އަގުގެ އިތުރުން މެދުމިންވަރެއްގެ އަގުތައް ވެސް ކަސްޓަމަރުންނަށް ވަޒަންކޮށްލެވޭނެއެވެ. ހަމައެއާ އެކު، ފާއިތުވި ދިހަ ދުވަހުގެ މުއްދަތުގައި މުދަލުގެ އަގަށް އައިސްފައިވާ ބަދަލުތައް ވެސް މި އެޕްލިކޭޝަންގެ އެހީގައި ދެނެގަނެވޭނެކަމަށް ވުޒާރާއިން މަޢުލޫމާތުދެއެވެ.
މި ޕްލެޓްފޯމުގައި ހިމަނާފައިވާ ތަކެއްޗަކީ ދިވެހިރާއްޖެއާއި ބައިނަލްއަޤުވާމީ ފެންވަރުގައި ބަލައިގަންނަ މިންގަނޑުތަކުގެ މައްޗަށް ބިނާކޮށް، ކަމާ ބެހޭ އިދާރާތަކުން ކަނޑައަޅާފައިވާ އަސާސީ ކާބޯތަކެތީގެ ލިސްޓެކެވެ. މުޅި މި މަޝްރޫޢުގެ މައިގަނޑު އަމާޒަކީ ދިވެހި ރައްޔިތުންނަށް އަތްފޯރާ ފަށުގައި އަސާސީ ބާވަތްތައް ގަންނަން ލިބޭނެ ފަހި މާޙައުލެއް ޤާއިމުކޮށްދިނުމެވެ.