ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ތެރޭގައި އަލަށް އުފެއްދި އަންހެނުންނާއި، ޒުވާނުން އަދި ދީނީ އިލްމުވެރިންގެ ގޮފީގެ ސަބަބުން އެ ޕާޓީގެ ސިޔާސީ ހަރަކާތްތައް މުޅި ރާއްޖޭގައި އިތުރަށް ހަރުދަނާވެގެންދާނެކަމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.
އަންނަ ސެޕްޓެމްބަރު މަހުގެ 15އިން 18އަށް ބޭއްވުމަށް ހަމަޖެހިފައިވާ ޕީއެންސީގެ ގައުމީ ކޮންގްރެސްއާ ގުޅޭގޮތުން މީޑިއާއަށް މައުލޫމާތު ދެއްވަމުން ހީނާ ފާހަގަކުރެއްވި ގޮތުގައި، މި ބައްދަލުވުމުގެ އެންމެ ބޮޑު އަމާޒަކީ 2028ވަނަ އަހަރުގެ ރިޔާސީ އިންތިޚާބު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ކާމިޔާބުކޮށްދިނުމަށްޓަކައި ޕާޓީގެ ސަފުތައް ރުކުރުވާލުމެވެ. މިއީ ރާއްޖޭގެ ސިޔާސީ ތާރީޚުގައި ބޭއްވޭ އެންމެ ބޮޑު އަދި އެންމެ ކާމިޔާބު ކޮންގްރެސްއަށް ހެދުމަށް މަސައްކަތްކުރައްވަމުން ގެންދަވާކަމަށް ވެސް އެކަމަނާ ވިދާޅުވިއެވެ.
ޕާޓީގެ އެތެރޭގެ އިންތިޒާމުތަކަށް އަލިއަޅުއްވާލައްވަމުން ހީނާ ވިދާޅުވީ، ރަސްމީ ސިފައެއްގައި އަންހެނުންނާއި ޒުވާނުންގެ ގޮތްޕެއް އުފެދިގެން ދިއުމަކީ އެ ފަރާތްތައް ސިޔާސީ މައިދާނުގައި ބާރުވެރިކުރުވުމަށް ރައީސް ނިންމެވި ވަރަށް މުހިންމު ނިންމެވުމެއް ކަމަށެވެ. މީގެ އިތުރުން، ދީނީ އިލްމުވެރިންނަށް ޚާއްސަ ގޮތްޕެއް އެކުލަވާލުމަކީ އިސްލާމްދީނަށް ރައީސް ޑރ. މުޢިއްޒު ދެއްވާ ހާއްސަ އިސްކަމާއި އަހައްމިއްޔަތުކަން ރަމްޒުކޮށްދޭ ކަމެއްކަން ފާހަގަކުރެއްވިއެވެ.
ޕާޓީގެ ލީޑަރޝިޕް ވަރުގަދަކުރުމުގެ ގޮތުން އެކި މަގާމުތަކަށް ވާދަކުރުމުގެ ފުރުސަތު ޑިމޮކްރެޓިކް އުސޫލުން ހުރިހާ މެމްބަރުންނަށް ހުޅުވާލެވިފައިވާއިރު، ގިނަ ބަޔަކު އެކަމަށް ޝައުގުވެރިކަން ފާޅުކުރަމުންދާކަން ވަޒީރު ހާމަކުރެއްވިއެވެ. އަދި އަތޮޅުތެރޭގައި ސްޓިއަރިންގ ކޮމިޓީތައް ހެދި، އިންތިޚާބުތަކަށްފަހު މުޅި ރާއްޖޭގައި ޕީއެންސީގެ ސިޔާސީ ހަރަކާތްތައް ވަރަށް ފުޅާކޮށް ފެށިގެންދާނެކަމުގެ ޔަގީންކަން އެކަމަނާ ދެއްވިއެވެ.