މި އަހަރުގެ ޖޫން މަހު ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ އަދަދު، ވޭތުވެދިޔަ އަހަރުގެ ޖޫން މަހާ އަޅާބަލާއިރު %12.9 ދަށަށް ހިނގައްޖެއެވެ.
ތަފާސްހިސާބުތައް ދައްކާ ގޮތުން، 2025ވަނަ އަހަރުގެ ޖޫންމަހު ރާއްޖެއަށް 141,772 ފަތުރުވެރިން ޒިޔާރަތްކުރިއިރު، މި އަހަރުގެ ޖޫންމަހު، މި އަދަދު ވަނީ 123,552އަށް ދަށްވެފައެވެ. މިއީ މިދިޔަ އަހަރާ އަޅާބަލާއިރު 18,220 ފަތުރުވެރިންގެ މަދުވުމެކެވެ.
މިއަހަރުގެ ފުރަތަމަ ހަ މަސްދުވަހަށް ބަލާއިރު، ރާއްޖޭގެ ފަތުރުވެރިކަން ވަނީ ޖުމްލަގޮތެއްގައި %5.1 ދަށަށް ގޮސްފައެވެ. 2025ވަނަ އަހަރުގެ ފުރަތަމަ ހަ މަސްދުވަހު 1,124,757 ފަތުރުވެރިން ރާއްޖެއަށް އައިސްފައިވާއިރު، މިއަހަރުގެ އެ މުއްދަތުގައި އައިސްފައި ވަނީ 1,067,543 ފަތުރުވެރިންނެވެ.
މި އަހަރުގެ ކުރީކޮޅު ފަތުރުވެރިކަން ކުރިއެރުންތަކެއް ދެއްކި ނަމަވެސް، ފަހަކަށް އައިސް އޮފް-ސީޒަން (ފަތުރުވެރިން އަންނަ މިންވަރު މަދު ދުވަސްވަރު) ތެރޭގައި މި އަދަދުތައް ވަނީ ބޮޑު ތަނުން ދަށްވާން ފަށާފައެވެ. މިއަހަރުގެ ތެރޭގައި އެންމެ ބޮޑު ދަށަށްދިއުމެއް ފާހަގަކުރެވިފައި ވަނީ މާޗް (%19.8-) އަދި އެޕްރީލް (%24.4-) މަހުގައެވެ.
ޖޫން މަހުގެ ތަފާސްހިސާބުތަކަށް ބަލާއިރު، ވިޔަފާރި ބޭނުންތަކަށް ރާއްޖެއަށް އައި މީހުންނާއި ކްރޫޒްލައިނާތަކުގައި އައި ފަސިންޖަރުންގެ އަދަދުތައް ހުރީ ނިސްބަތުން ދަށްކޮށެވެ. ނަމަވެސް، މިއަހަރުގެ ފުރަތަމަ ހަ މަސްދުވަހަށް ޖުމްލަކޮށް ބަލާއިރު ކްރޫޒްލައިނާ ފަސިންޖަރުންގެ އަދަދު ވަނީ 8,263އިން 14,847 އަށް ބޮޑު ކުރިއެރުމެއް ހޯދާފައެވެ.