ތައިލެންޑުން ތިމާވެށީގެ މަޝްރޫއުތަކަށް ތައިލެންޑްގެ އެހީތެރިކަން ހޯދަން މަޝްވަރާތަކެއް ބާއްވައިފިއެވެ.
އެ މަޝްވަރާތައް ކުރިއަށް ދިޔައީ އެންވަޔަރަމަންޓް މިނިސްޓަރު އަލީ ޝަރީފް ތައިލެންޑަށް ކަނޑައަޅުއްވާފައި ހުންނަވާ ރާއްޖޭގެ ސަފީރު ފުއާދު ތައުފީގުއާއެކު ބޭއްވެވި ބައްދަލުކުރެއްވުމުގައެވެ.
އެ ބައްދަލުކުރެއްވުން ކުރިއަށްދިޔައީ ރާއްޖޭގެ ތިމާވެށި ރައްކާތެރިކުރުމަށް ކުރެވެމުންދާ މަސައްކަތްތަކުގައި ތައިލެންޑުގެ އެހީތެރިކަމާއި އެއްބާރުލުން ހޯދުމާ ގުޅޭގޮތުން މަޝްވަރާކުރުމަށެވެ. ހާއްސަކޮށް ރާއްޖޭގައި މިހާރު ކުރިއަށްދާ ތިމާވެށީގެ އެކި އިސްނެގުންތަކަށް ބޭނުންވާ ފަންނީ އަދި އިލްމީ އެހީތެރިކަން ތައިލެންޑް ސަރުކާރުގެ ފަރާތުން ހޯދުމަށް އެ ބައްދަލުވުމުގައި އަލިއަޅުވާލާފައިވެއެވެ.
މިނިސްޓަރު ޢަލީ ޝަރީފް ފާހަގަކުރެއްވި ގޮތުގައި، ތައިލެންޑަކީ ތިމާވެށީގެ ދާއިރާގައި ބޭނުންކުރާ ޓެކްނޮލޮޖީއާއި، އިންސާނީ ވަސީލަތްތައް ބިނާކުރުމުގެ ރޮނގުން ބޮޑެތި ކުރިއެރުންތަކެއް ހޯދާފައިވާ ގައުމެކެވެ. އެހެންކަމުން، އެ ގައުމުގެ ތަޖުރިބާއާއި ވަސީލަތްތަކުގެ ބޭނުން ހިފައިގެން ރާއްޖޭގެ ތިމާވެށީގެ ދާއިރާ އިތުރަށް ހަރުދަނާކުރުމަކީ ލިބޭނެ ވަރަށް ބޮޑު ފުރުސަތެކެވެ.
އެ ބައްދަލުވުމަކީ ވަރަށް ކާމިޔާބު އަދި ނަތީޖާ ނެރެވޭނެ ފަދަ މަޝްވަރާތަކެއް ކުރެވުނު ބައްދަލުވުމެއްގެ ގޮތުގައި މިނިސްޓަރު ސިފަކުރެއްވިއެވެ. އަދި އެ ބައްދަލުވުމުގެ ސަބަބުން ކުރިއަށް އޮތް ތަނުގައި ތިމާވެށީގެ ރޮނގުން ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެ، އައު މަޝްރޫއުތަކަށް މަގުފަހިވެގެންދާނެ ކަމަށް އުންމީދު ކުރެވޭކަމަށް ވެސް ވިދާޅުވިއެވެ.