ވައިގެ މަގުން ރާއްޖެ އެތެރެކުރަން އުޅުނު 7.2 މިލިއަން ރުފިޔާގެ މަސްތުވާތަކެތި ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން އަތުލައިގެންފި އެވެ.
މޯލްޑިވްސް ކަސްޓަމްސް ސާވިސްއިން ބުނީ އެ ތަކެތި އަތުލައިގެންފައި ވަނީ ވައިގެ މަގުން އެތެރެކުރި ޝިޕްމަންޓެއްގައި މަސްތުވާތަކެތި ހުރި ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން އެ ޝިޕްމަންޓް ބަލައި ފާސްކުރުމަށް ރޭ ހިންގި ހާއްސަ އޮޕަރޭޝަނެއްގައި ކަމަށެވެ.
އަތުލައިގަތް މަސްތުވާތަކެތި ފުރަތަމަ މަރުހަލާގެ ތަހުލީލުތަކުން މެތަމްފެޓަމައިން (މެތު) އަށް ޕޮޒިޓިވްވެފައިވާ ކަމަށް ކަސްޓަމްސްއިން ބުންޏެވެ.
ވައިގެމަގުން ރާއްޖެއަށް އެތެރެކުރަން އުޅުނު 3.6 ކިލޯގެ މަސްތުވާތަކެތި ކަސްޓަމްސްއިން އަތުލައިގެންފި.
ބާވަތް: މެތަމްފެޓަމައިން
ބަރުދަން: 3.6 ކިލޯގްރާމް
ތާރީޚް: 22 މޭ 2025 pic.twitter.com/r8aYIOW9iD— Maldives Customs Service (@CustomsMv) May 22, 2025
ކަސްޓަމްސްއިން ބުނި ގޮތުގައި އެ ތަކެތީގެ ބަރުދަނުގައި ޕެކިން އާއެކު ޖުމްލަ 3.6 ކިލޯ ހުރި ކަމުގަ އެވެ. މަގުމަތީ އަގުން ނަމަ އެއީ 7.2 މިލިއަން ރުފިޔާގެ މަސްތުވާތަކެތިކަން ފާހަގަކޮށްފައިވެ އެވެ.
މައްސަލަ އިތުރަށް ތަހުގީގު ކުރަން އަތުލައިގަތް ތަކެތި ފުލުހުންނާ ހަވާލުކޮށްފައިވާ ކަމަށް ކަސްޓަމްސްއިން ބުންޏެވެ.