ރޭ ދަންވަރުގެ ވަގުތެއްގައި، ކުރީގެ ރައީސް މުޙައްމަދު ނަޝީދުގެ ކޮއްކޯފުޅު އަދި ޤާނޫނީ ވަކީލު އަޙުމަދު ނާޒިމް ޢަބްދުއްސައްތާރަށް ތޫނު އެއްޗަކުން ހަމަލާދީ ވަރަށް ބޮޑަށް ޒަޚަމްކޮށްލުމާ ގުޅިގެން އޭޑީކޭ ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުންގެ އިދާރާއިން މައުލޫމާތު ދީފައިވާ ގޮތުގައި، ޒަޚަމްތަކަކާ އެކު އުމުރުން 49 އަހަރުގެ ދިވެހި ފިރިހެނަކު އޭޑީކޭ ހޮސްޕިޓަލަށް ގެންގޮސްފައިވާކަން އެ މުއައްސަސާއަށް އަންގާފައި ވަނީ ރޭ މެންދަމު 12:09 ހާއިރުއެވެ. ފުލުހުން ރަސްމީކޮށް އަނިޔާވި މީހާގެ ކާކުކަން ހާމަނުކުރެއެވެ.
ނަމަވެސް، “ދެން”އަށް މައުލޫމާތު ލިބިފައިވާ ގޮތުގައި ރޭގެ ވަގުތެއްގައި ތޫނު އެއްޗަކުން ހަމަލާދީފައި ވަނީ ނާޒިމް ޢަބްދުއްސައްތާރަށެވެ.
މި ހާދިސާގައި ނާޒިމަށް ލިބިފައިވާ އަނިޔާގެ ކުޑަބޮޑުމިން ހޮސްޕިޓަލުން އަދި ހާމަކޮށްފައި ނުވާއިރު، މި ޖަރީމާ ހިންގީ ކޮން ބައެއްކަމެއް އަދި ހަމަލާދިން ސަބަބެއް ވެސް މިހާތަނަށް ހޯދިފައެއް ނުވެއެވެ.
މި މައްސަލަ ދިވެހި ފުލުހުންގެ ޚިދުމަތުން މިހާރު ދަނީ ވަރަށް ސީރިއަސް މައްސަލައެއްގެ ގޮތުގައި ތަޙުޤީޤު ކުރަމުންނެވެ.
49 އަހަރުގެ ދިވެހި ފިރިހެނަކަށް ތޫނު އެއްޗަކުން ހަމަލާދީ ޒަޚަމްކޮށްލައިފި