ފެނަކަ ކޯޕަރޭޝަނާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އުވާލުމަށް ފަހު، އެ ދެ ކުންފުނީގެ މަސައްކަތްތައް ސްޓެލްކޯ އަދި އެމްޓީސީސީގެ ދަށަށް ބަދަލުކުރަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިޢުލާންކުރައްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން އެމަނިކުފާނު ވިދާޅުވީ، އާރްޑީސީއާއި އެމްޓީސީސީން ވެސް ކުރަމުންދަނީ މަގުހެދުމާއި އުމްރާނީ ތަރައްޤީގެ އެއްގޮތް މަސައްކަތްތަކެއް ކަމަށްވުމުން، އެކަންކަމަށް ދާ ޚަރަދު އިންތިހާއަށް ބޮޑުވެގެންދާ ކަމަށެވެ. އެހެންކަމުން، އާރްޑީސީ އުވާލައި އެމްޓީސީސީއާ އެއްކޮށްލުމުން ސަރުކާރުގެ ހިއްސާ އިތުރުވެ، ރައްޔިތުންނަށް އޭގެ މަންފާ ލިބޭނެކަމަށް ވިދާޅުވިއެވެ. ހަމައެއާ އެކު، މުޅި ރާއްޖެއަށް ކަރަންޓުގެ ޚިދުމަތް ފޯރުކޮށްދިނުމުގެ އެންމެހާ މަސްއޫލިއްޔަތުތައް ދެން އުފުލާނީ ސްޓެލްކޯއިން ކަމުގައި ވެސް ރައީސް ފާހަގަކުރެއްވިއެވެ.
ފެނަކައަށް އިޝާރާތްކުރައްވައި ރައީސް ވިދާޅުވީ، ނިމިދިޔަ އެމްޑީޕީގެ ސަރުކާރުގައި އެ ކުންފުނި މެދުވެރިކޮށް ބޮޑެތި ޖަރީމާތަކެއް ހިންގާފައިވާކަން އޮޑިޓް ރިޕޯޓުތަކުން ސާފުކޮށް ފެންނަން އޮތް ކަމަށެވެ. ފަންނީ ތަޖުރިބާކާރުންގެ ލަފާގެ މަތިން، އެ ކުންފުނީގެ ޙާލަތު ފިޔަވަހިތަކަކަށް ބަހާލައިގެން ރަނގަޅުކުރުމަށްވުރެ، އެއްކޮށް އުވާލައި ސްޓެލްކޯގެ ދަށަށް ގެންދިއުމަކީ އެންމެ ދެމެހެއްޓެނިވި ގޮތްކަމަށް ކަނޑައަޅުއްވާފައިވާކަން ހާމަކުރެއްވިއެވެ. އަދި މި ބަދަލުތަކާ އެކު ދެ ކުންފުނީގެ އޮނިގަނޑު އެއްކޮށްލެވި، އިތުރުވެފައިވާ މުވައްޒަފުންގެ އަދަދުތައް ވެސް މަދުވެގެންދާނެކަން ފާހަގަކުރެއްވިއެވެ.
މީގެ އިތުރުން، ދަނޑުވެރިކަމާ ބެހޭ ކުންފުނި ‘އެގްރޯ ނެޓް’އަކީ މިފްކޯގެ ސަބްސިޑިއަރީ ކުންފުންޏެއްގެ ގޮތުގައި ހަމަޖެއްސުމަށް ނިންމަވާފައިވާކަން ވެސް ރައީސް އިޢުލާންކުރެއްވިއެވެ. މި ބަދަލާ އެކު، ކުރީގެ ދަތުރުވެރިންގެ މާރުކޭޓު ހުރި ބިމުގައި އަލަށް އިމާރާތްކުރާ ‘މާލޭ ވެޓް މާކެޓް ކޮމްޕްލެކްސް’ ހިންގުމުގެ ޒިންމާ މިފްކޯއާ ހަވާލުކުރެވި، ދަނޑުވެރިންނާއި މަސްވެރިންނަށް ގިނަ ފައިދާތަކެއް ލިބޭނެކަމަށް އުންމީދުކުރައްވާ ކަމަށް ވިދާޅުވިއެވެ. އަމާޒަކީ އަންނަ ޑިސެމްބަރު މަހުގެ 10ވަނަ ދުވަހަށް އެ މާރުކޭޓުގެ މަސައްކަތް އެއްކޮށް ނިންމާލުމެވެ.
ސަރުކާރުގެ ކުންފުނިތައް ރީސްޓްރަކްޗަރ ކުރުމުގެ މި މުހިންމު ނިންމުންތައް ތަންފީޒުކުރުމުގެ އަމަލީ މަސައްކަތް ކަމާ ބެހޭ އިދާރާތަކުން ކުރިއަށް އޮތް ދުވަސްތަކުގައި ފަށާނެއެވެ. މިކަމުގެ މައިގަނޑު ބޭނުމަކީ ޚަރަދުކުޑަ އަދި ހަރުދަނާ ނިޒާމެއްގެ ތެރެއިން ރައްޔިތުންނަށް ބޭނުންވާ ޚިދުމަތްތަކާއި އުމްރާނީ ތަރައްޤީގެ މަޝްރޫޢުތައް ހަލުވިކަމާ އެކު ގެނެސްދިނުމެވެ.