ޣައްޒާގެ ވަޒަންވެރިން ގަދަކަމުން އެހެން ސަރަހައްދުތަކަށް ބޭރުކުރުމަށް އިސްރާއީލުގެ ހައްދުފަހަނައެޅި ބައެއް ވަޒީރުން ގޮވާލަމުންދާ ގޮވާލުންތަކަކީ ބައިނަލްއަޤްވާމީ ޤާނޫނުތަކާ ކަނޑައެޅިގެން ޚިލާފު ބޮޑު ޖަރީމާއެއްކަމަށް ސިފަކޮށް، އެކަން ހަރުކަށި އިބާރާތުން ކުށްވެރިކޮށްފިއެވެ.
ދިވެހިރާއްޖޭގެ ޚާރިޖީ ވުޒާރާއިން މިއަދު ނެރުނު ބަޔާނެއްގައި، މެދުއިރުމަތީގެ ސުލްޙަޔަށް އޮތް ބޮޑު ހުރަހެއްގެ ގޮތުގައި މި އަމަލުތައް ފާހަގަކުރައްވަމުން، ސަރުކާރުން ވަނީ ފަލަސްޠީނުގެ ބިންތަކުން އެމީހުން ބޭރުކުރުމަށް ދައްކާ އެއްވެސް ބަހަނާއެއް ގަބޫލުނުކުރާނެކަން ހާމަކޮށްފައެވެ. އަދި ޣައްޒާއަކީ ފަލަސްޠީނުގެ ބައެއް ކަމަށާއި، އަމިއްލަ ވަޒަނުގައި ދިރިއުޅުމުގެ ޙައްޤު އެ ރައްޔިތުންނަށް ފުރިހަމަޔަށް ލިބިގެންވާކަން ވެސް އެ ބަޔާނުގައި ތަކުރާރުކޮށްފައިވެއެވެ. މީގެ އިތުރުން، އދ. ގެ ސަލާމަތީ މަޖިލީހާއި ބައިނަލްއަޤްވާމީ މުޖުތަމަޢުން މިކަން ހުއްޓުވައި، ކުށްވެރިން ޖަވާބުދާރީކުރުވުމަށް ރާއްޖެއިން ވަނީ ގޮވާލާފައެވެ.
ފަލަސްޠީނުގެ ރައްޔިތުންނާ އެކު ދިވެހިން އަބަދުވެސް ސާބިތުކަމާ އެކު ތިބޭނެކަން ޔަޤީންކޮށްދެމުން، ރާއްޖެއިން ވަނީ 1967ގެ ކުރިން އޮތް ސަރަޙައްދީ އިމުގެ މައްޗަށް ބިނާކޮށް، އިރުމަތީ ޤުދުސް އަކީ ވެރިރަށް ކަމުގައި ހިމެނޭ މިނިވަން ދައުލަތެއް އުފެއްދުމަށް ކުރާ ތާއީދު އަލުން އާކޮށްފައެވެ.
ސަރުކާރުން މިފަދަ ބަޔާނެއް ނެރެފައި މި ވަނީ، ކުރިއަށް އޮތް ހަތް އަހަރުގެ ތެރޭގައި ޣައްޒާގެ 1.9 މިލިއަން މީހުން އެ ސަހަރުން ބޭރުކުރުމަށް އިސްރާއީލުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވިރް ޚާއްޞަ ޕްލޭނެއް ހުށަހަޅާފައިވާ ދަނޑިވަޅެއްގައެވެ. “ޑިސްއެންގޭޖްމަންޓް 710″ގެ ނަމުގައި އޭނާގެ “ޖުވިޝް ޕަވާ” ޕާޓީން އެކުލަވާލި މި ސިޔާސަތަކީ އޮކްޓޫބަރު 27ގައި އޮންނަ އިސްރާއީލުގެ ޕާލަމެންޓް އިންތިޚާބަށް އަމާޒުކޮށް ނެރުނު ރޭވުމެކެވެ. މި ރޭވުމުގެ ދަށުން ފުރަތަމަ އަހަރު 250،000 މީހުން އަދި ހަތް އަހަރު ނިމޭއިރު 1.86 މިލިއަން މީހުން ޣައްޒާއިން އެހެން ޤައުމުތަކަށް ބޭރުކުރުމަށް ވަނީ އަމާޒުހިފާފައެވެ.
މި ނުރައްކާތެރި ޕްލޭނާ ދެކޮޅަށް ފަލަސްޠީނާއި ޢަރަބި ޤައުމުތަކުގެ އިތުރުން އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ވެސް އަންނަނީ އަޑުއުފުލަމުންނެވެ. ޚާއްޞަކޮށް މިއީ 1948ގެ “ނަކްބާ” އާ އެއްފަދަ އަމަލެއްގެ ގޮތުގައި ސިފަކޮށް، މިސްރުން ވަނީ ފަލަސްޠީނު ރައްޔިތުން އެ ޤައުމަށް އެތެރެވުމުގެ އެއްވެސް ފުރުޞަތެއް ނުދޭނެކަން ކަށަވަރުކޮށްދީފައެވެ. މިއީ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވިސްނުންފުޅަކާ ވެސް ގުޅިފައިވާ އަދި އިންތިޚާބު ކާމިޔާބުކުރުމަށް ބެން-ގްވިރް ކުޅޭ ސިޔާސީ ކުޅިގަނޑެއްކަމަށް މުޙައްލިލުން ދެކެއެވެ.
މިއީ އަދި އިސްރާއީލު ސަރުކާރުގެ ރަސްމީ ސިޔާސަތަކަށް ނުވިނަމަވެސް، ހައްދުފަހަނައެޅި ޔަހޫދީ ޕާޓީތަކުން މަސައްކަތްކުރަމުން ދަނީ ކުރިއަށް އޮތް އިންތިޚާބަށްފަހު އުފައްދާ ކޯލިޝަން ސަރުކާރެއްގެ މައިގަނޑު ޝަރުޠަކަށް މި ނުބައި ރޭވުން ތަންފީޒުކުރުން ހެދުމަށެވެ.