ޤަޠަރުގެ ކުރީގެ އަމީރު ޝައިޚް ޙަމަދު ބިން ޚަލީފާ އާލްޘާނީ އަވަހާރަވުމާ ގުޅިގެން ދިވެހި ސަރުކާރުގެ ފަރާތުން ތައުޒިޔާ ރައްދުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ހެނދުނު އެ ޤައުމަށް ފުރާވަޑައިގެންފިއެވެ.
ރައީސް އޮފީހުން މައުލޫމާތު ދެއްވާ ގޮތުގައި، މިއީ ރަސްމީ ހައިސިއްޔަތުން ރައީސް ކުރައްވާ ދަތުރުފުޅެކެވެ. މި ދަތުރުފުޅުގެ ތެރެއިން ޤަޠަރުގެ މިހާރުގެ އަމީރު ޝައިޚް ތަމީމް ބިން ޙަމަދު އާލްޘާނީއާ ބައްދަލުކުރައްވައި، ހިތާމަވެރި މި ދަނޑިވަޅުގައި ދިވެހިންގެ ނަމުގައި ރައީސް ތައުޒިޔާ ވިދާޅުވާނެއެވެ. ޝައިޚް ޙަމަދުގެ މައްޗަށް ކަށުނަމާދުކޮށް، ފަސްދާނުލުމުގެ ރަސްމިއްޔާތު އިއްޔެ ވަނީ ބާއްވާފައެވެ.
މީލާދީން 1995އިން ފެށިގެން 2013ވަނަ އަހަރާ ހަމައަށް ޤަޠަރުގެ ވެރިކަން ކުރެއްވި ޝައިޚް ޙަމަދަކީ އެ ޤައުމަށް އިންގިލާބީ ތަރައްގީއެއް ގެނެސްދެއްވި ހިންގުންތެރި ލީޑަރެކެވެ. ދުނިޔޭގެ ނިސްބަތުން ޤަޠަރަކީ މުއްސަނދި އަދި ބާރުގަދަ އިގުތިސާދަކަށް ހެއްދެވުމުގެ އިތުރުން، އެ ސަރަހައްދުގައި ފުޅާ ދާއިރާއެއްގައި ސިޔާސީ ނުފޫޒު އުފެއްދެވީ އެމަނިކުފާނުގެ ޒައާމަތުގައެވެ. ދުނިޔޭގެ މަޝްހޫރު މީޑިއާ ނެޓްވޯކް ‘އަލްޖަޒީރާ’ 1996ގައި ވުޖޫދަށް ގެންނެވުމާއި، 2022ގެ ފީފާ ވޯލްޑް ކަޕް ބޭއްވުމުގެ ޝަރަފު ޤަޠަރަށް ހޯއްދަވައިދެއްވުމަކީ ވެސް އެމަނިކުފާނުގެ ދުރުވިސްނުންފުޅުގެ ނަތީޖާއެވެ. އަމިއްލަފުޅު އިޚުތިޔާރުގައި 2013ގައި ވެރިކަމުން ދުރުވެވަޑައިގަތީ ދަރިކަލުން ޝައިޚް ތަމީމްއާ ވެރިކަމުގެ ޒިންމާތައް ހަވާލުކުރެއްވުމަށް ފަހުއެވެ.
ޝައިޚް ޙަމަދުގެ ވެރިކަމުގައި ރާއްޖެއާ ދެމެދު އޮތް ގުޅުން ވަރަށް ބޮޑަށް ބަދަހިކުރައްވައި، ދިވެހިންނަށް އަގުހުރި އެހީތަކެއް ފޯރުކޮށްދެއްވިއެވެ. އޭގެ ތެރޭގައި ޤަޠަރު ސަރުކާރުގެ ހިލޭ އެހީގެ ދަށުން ލ. ގަމުގައި ބިނާކޮށްދެއްވި ‘ޝައިޚް ހަމަދު ބިން ޚަލީފާ އާލް ޘާނީ ސްކޫލް’ ފާހަގަކޮށްލެވެއެވެ. ފެބްރުއަރީ 15، 1998ގައި ހުޅުވި މި ސްކޫލުގެ އިތުރުން، ހުޅުމާލޭގައި ބިނާކޮށްފައިވާ ބޮޑު މިސްކިތް ނުވަތަ މަސްޖިދުލް ޝައިޚް ޤާސިމް ބިން އަލްޘާނީ އިމާރާތްކުރުމަށް ވެސް އެމަނިކުފާނު ވަނީ ދީލަތި އެހީތެރިކަމެއް ވެދެއްވާފައެވެ.