ގޯއްޗާއި ފްލެޓު ހޯދައިދޭނެކަމަށް ބުނެ ގިނަ ބައެއްގެ އަތުން މަކަރާއި ހީލަތުން ފައިސާ ހޯދާފައިވާކަމުގެ ތުހުމަތުތަކެއްގައި ދަނޑުވެރިކަމާއި، މަސްވެރިކަމާއި އަދި ކަނޑުގެ ވަސީލަތްތަކާ ބެހޭ ވުޒާރާގެ ނައިބު ވަޒީރު މުޙައްމަދު ޔަސީން މީގެ ދެ ހަފުތާ ކުރިން މަޤާމުން ވަކިކޮށްފިއެވެ.
ސަރުކާރުގެ އިސް ތަރުޖަމާނު މުޙައްމަދު ޙުސެއިން ޝަރީފް ވަނީ މި ޚަބަރު ކަށަވަރުކޮށްދެއްވާފައެވެ. އޭނާ ހާމަކުރެއްވި ގޮތުގައި، ޔަސީންގެ މައްޗަށް ކުރެވުނު ތުހުމަތުތަކާ ގުޅިގެން ފުރަތަމަ ފިޔަވަޅެއްގެ ގޮތުން އޭނާ ވަނީ ސަސްޕެންޑު ކުރެވިފައެވެ. އަދި އޭގެ ފަހުން އެ ވުޒާރާއިން ހިންގި އެތެރޭގެ ތަޙުޤީޤަކަށް އެ ތުހުމަތުތަކަކީ އަސްލެއް ނެތް ވާހަކަތަކެއް ނޫންކަން ސާބިތުވުމާ އެކު، އޭނާ ވަޒީފާއިން ވަކިކުރަން ނިންމެވީއެވެ.
މި ބޮޑު މައްސަލަ މިހާރު ދިވެހި ފުލުހުންގެ ޚިދުމަތުން ވެސް ދަނީ ތަޙުޤީޤު ކުރަމުންނެވެ. ފުލުހުން މިއަދު ބުނެފައި ވަނީ، ބޯހިޔާވަހިކަން ފޯރުކޮށްދޭނެކަމުގެ ޔަޤީންކަންދީ ރައްޔިތުންގެ އަތުން މަކަރާއި ހީލަތުން ފައިސާ ނަގާފައިވާ މައްސަލައެއް އެ އިދާރާގެ ސަމާލުކަމަށް އައިސްފައިވާތީ އެކަން ބަލަމުން ގެންދާކަމަށެވެ. އެހެންނަމަވެސް، މި ތަޙުޤީޤާ ގުޅޭ އިތުރު މަޢުލޫމާތެއް ފުލުހުން އަދި އާންމުކޮށްފައެއް ނުވެއެވެ.
ދައުލަތުގެ ތަރުޖަމާނު އިތުރަށް ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ގެންގުޅުއް ވަނީ ކޮރަޕްޝަނަށް އެއްވެސް ޖާގައެއް ނުދިނުމުގެ ސިޔާސަތެކެވެ. އެހެންކަމުން، ސަރުކާރުގެ ކޮންމެ ފަންތިއެއްގެ މަޤާމެއްގައި ހުރި ފަރާތަކަށް ވިޔަސް، ކޮރަޕްޝަންގެ ޢަމަލެއް ހިންގައިފިކަމުގެ ތުހުމަތު ކުރެވިއްޖެނަމަ އެކަމެއް ތަޙުޤީޤުކޮށް ވަގުތުން ފިޔަވަޅު އަޅުއްވާނެކަމުގެ ޔަޤީންކަން އޭނާ ދެއްވިއެވެ. އަދި ގެދޮރުވެރިކުރުމުގެ މަޝްރޫޢުތައް ސަރުކާރުން ހިންގާނީ ރައްޔިތުންނަށް އެންމެ ސާފުކޮށް ފެންނާނެ ނިޒާމެއްގެ ތެރެއިންކަމަށް ވެސް ޝަރީފް ވިދާޅުވިއެވެ.