އަލިފާން ރޯވެ، އެނދި “ހޮޅުދޫ ބޯޓު”ން ގެއްލުނު ޒުވާނާ ހޯދަން ބޮޑު ސަރަހައްދެއް ބެލި ނަމަވެސް އޭނާގެ ހިލަމެއް ނުވާކަމަށް އެމްއެންޑީއެފްއިން ބުނެފި އެވެ.
ހޮޅުދޫ ބޯޓުގައި ރޯވީ ތ. ހިރިލަންދޫން ފުރައިގެން މާލެ ދަތުރުކުރަނިކޮށް ރޭ 09:07 ހާއިރު އެވެ. އެ ހާދިސާގައި ލ. މާވަށަށް ނިސްބަތްވާ އުމުރުން 25 އަހަރުގެ އަލީ މުޝްފިގް މުހައްމަދު ޝަރީފް ވަނީ ގެއްލިފަ އެވެ.
އެމްއެންޑީއެފްއިން ބުނީ މުޝްރިފް ހޯދުމުގެ މަސައްކަތުގައި ކަނޑާއި ވައިގެމަގުންނާއި ޑައިވަރުން ވެސް ހަރަކާތްތެރިވަމުންދާ ކަމަށެވެ.
އެމްއެންޑީއެފްއިން ވަނީ
- ސަރފޭސް ސަރޗްގެ ގޮތުގައި 53.04 ސްކުއެއާ ނޯޓިކަލް މޭލް ވަނީ ބަލާފަ.
- އަންޑަރވޯޓަރ (ޑައިވިންގ) ސަރޗްގެ ގޮތުގައި 64240 އަކަމީޓަރު ވަނީ ބަލާފަ.
- ވައިގެ މަގުން 1545 ސްކުއެއާ މޭލް (4000 އަކަމީޓަރު) ވަނީ ބަލާފަ.
އެެހެން ނަމަވެސް މުޝްރިފްގެ ހަބަރެއް ނުވާކަމަށް އެމްއެންޑީއެފްއިން ބުންޏެވެ.
މުދާ އުފުލާ އެ ބޯޓުން 18 މީހުން ދަތުރުކުރިއިރު އޭގެ ތެރެއިން 17 މީހުން ސަލާމަތްކޮށް، ކަނޑޫދޫއަށް ގެންދިޔަ އެވެ. ހާދިސާ އާ ގުޅިގެން ތ. އަތޮޅު ޕޮލިސް ސްޓޭޝަނުގެ ފަރާތުން އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑަށް އެހީތެރިކަން ލިބުނުކަން އެމްއެންޑީއެފުން ފާހަގަކުރެ އެވެ.
ބޯޓުގައި މުދާ ހުރި އަދަދާއި ހާދިސާ ހިނގަން މެދުވެރިވި ސަބަބު އަދި އެނގިފައެއް ނުވެ އެވެ.