ފުލުހުންގެ ކާރު މައްޗަށް އަރައި ނެށިތަން ފެންނަ ވީޑިއޯ ދައުރުނުކުރަން ފުލުހުންގެ ހިދުމަތުން އެދިއްޖެއެވެ.
ސޯޝަލް މީޑިއާގައި ވަރިރަލް ވެގެން އުޅޭ ވީޑިއޯއެއްގައި އަންހެނަކު ފުލުހެއްގެ ކާރަށް އަރައިގެން ނަށާ ހަދާތަން ފެނެއެވެ. އެހެންވެ ގިނަ ބައެއްގެ ފާޑުކިއުން އެ އަންހެންމީހާގެ މައްޗަށް އަމާޒުވެފައިވާ އިރު ފުލުހުން އެ މައްސަލަ ނުބަލާތޯވެސް ގިނަ ބަޔަކު ދަނީ އަހަމުންނެވެ.
އެ މައްސަލައާ ގުޅިގެން ފުލުހުން މިއަދި މީޑިއާތަކާ ހިއްސާކުރި މެސެޖެއްގައި ބުނީ ވީޑިއޯއިން ފެންނަނީ އުމުރުން 15އަހަރުގެ ކުޑަކުއްޖެއް ކަމަށާއި ވީޑިއޯއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.
ފުލުހުން ބުނީ ވީޑިއޯއިން ފެންނަ ކޮންޓެންޓް، ކުއްޖާއަށް ފުރައްސާރަ ރައްދުވާ ގޮތަށް އާންމުކޮށް އަލުން ބްރޯޑްކާސްޓްކުރުމަކީ އެ ކުއްޖާއަށް ނަފްސާނީ ގޮތުންނާއި އިޖުތިމާއީ ގޮތުން ގެއްލުންތަކެއް ލިބި، ކުޑަކުދިންގެ ހައްގުތައް ރައްކާތެރިކުރުމަށް ކަނޑައަޅާފައިވާ އަހުލާގީ މިންގަނޑުތަކާ ހިލާފު ކަމެއް ކަމަށެވެ.
“އެހެންކަމުން، އެއްވެސް މީޑިއާ އިދާރާއަކުން ނުވަތަ ސޯޝަލް މީޑިއާ ޕޭޖުތައް ހިންގަވާ ފަރާތްތަކުން މި ވީޑިއޯ އެއްވެސް ސިފައެއްގައި އަލުން ހިއްސާ ނުކުރުމަށާއި، މިހާރު ހިއްސާކޮށްފައިވާ ވީޑިއޯތައްވެސް އާންމުންނަށް ނުފެންނާނެހެން ނެގުމަށް ބާރުއަޅައި އިލްތިމާސްކުރަމެވެ.” ފުލުހުން ހިއްސާކުރި މެސެޖުގައި ބުންޏެވެ.