އަވައްޓެރި ލަންކާގެ ރައްޔިތުންނަށް އެހީތެރިވުމަށް ހިންގާ “ސިލޯނާއެކު ދިވެހިން” ޓެލެތޯނަށް ޕީޕަލްސް ނޭޝަނަލް ކޮންގްރެސް(ޕީއެންސީ)ގެ ޕާލިމެންޓަރީ ގްރޫޕުން 3 ލައްކަ ރުފިޔާ ހަދިޔާކޮށްފިއެވެ.
ޕީއެންސީގެ ޕީޖީ ގްރޫޕުގެ ލީޑަރު އިބްރާހީމް ފަލާޙް ވިދާޅުވީ، މި އެހީއަކީ ދާއިރާތަކުގެ ރައްޔިތުންނާއި ދިވެހި އެންމެހައި ރައްޔިތުންގެ ނަމުގައި ޕީޖީ ގްރޫޕުން ދޭ އެހީއެއް ކަމަށެވެ. އަދި މިގޮތަށް ގޮވާލާ ކޮންމެ ގޮވާލުމެއްގައި އެންމެ ކުރީ ސަފުގައި އަބަދުވެސް ނިކުމެ ޕީއެންސީ ބައިވެރިވާނެ ކަމަށް ޕީޖީ ލީޑަރު ފަލާޙް ވިދާޅުވިއެވެ.
“މި އެހީ ރަމްޒުކޮށްދެނީ މެންބަރުގެ ދާއިރާތައް. ޖުމްލަކޮށް ހުރިހާ ދިވެހި ރައްޔިތުން. އުންމީދުކުރަނީ ލަންކާ މި ޙާލަތުން އަރައިގަނެ، ޤައުމު އަލުން އާރާސްތުވުން.” ފަލާޙް ވިދާޅުވިއެވެ.
މިއަދު ހެނދުނު 9:00 ގައި ފެށި ޓެލެތޯން މިރޭ މެންދަމު 1:00އާ ހަމައަށް ކުރިއަށްދާނެކަމަށް ޕީއެސްއެމް އިން މަޢުލޫމާތުދެއެވެ. އެހީތެރިވާން ބޭނުންވާ ފަރާތްތަކުން ޓީވީ ބިލްޑިންގއާއި މާލޭގެ އެކި ސަރަހައްދުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތު ހުޅުވާލެވިފައިވާ ކަމަށް ޕީއެސްއެމްއިން ބުނެއެވެ.