ސަލްޓަން ޕާކް ތަރައްގީ ކުރުމުގެ މަސައްކަތް ކުރަމުން ދަނީ އެ ޕާކުގެ އެއް ގަހުން އަނެއް ގަހަށް ދެވޭ ގޮތަށް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ ހުރި ސުވާލުތައް ޖަވާބު ދެއްވުމަށް ރައީސްއާއި ޕްރެޒެންޓަރު އަހްމަދު ޝަކީބު (ޝަކީއްބެ) ހިންގަވާ “ރައްޔިތުންނާ އެކު” ޕޮޑްކާސްޓްގައި އެމަނިކުފާނު ވިދާޅުވީ ސަލްޓަން ޕާކް ތަރައްގީ ކުރާނީ ގިނަ ހަރަކާތްތަކެއް އެ ތަނުގައި ހިންގޭ ގޮތަށް ކަމަށެވެ.
“ސަލްޓަން ޕާކަކީ ވަރަށް ގިނަ ގަސް ހުންނަ ތަނެއްވީމާ، އަޅުގަނޑުމެން ހަދާއިރުގައި، އެއްގަހުން އަނެއް ގަހަށް ދެވޭ ގޮތަށް، މަތީގައި އެކިކަހަލަ އެކްޓިވިޓީޒްތައް ހިމަނާފައި، އެކަހަލަ ބައިބައި ހިމަނާފައި، ކުރަން ނިންމާފައި މި އޮތީ. ތަންކޮޅެއް ޝައުޤުވެރިވާ ކަހަލަ ގޮތަކަށް،” ރައީސް ވިދާޅުވިއެވެ.
“އެއްގަހުން އަނެއް ގަހަށް ގޮސްލައި ހަދައިލެވޭކަހަލަ، ތަންކޮޅެއް އެޑްވެންޗަރަސްއޭ މި ކިޔާ ކަހަލަ ކަންތައްތައް. ބިންމަތީ ލެވެލްގެ އިތުރަށް، މަތީގައި ކުޑަ ޕާކެއް އަންނާނެ ކަމަށް ބައްލަވަންވީ.”
ރައީސް މުއިއްޒުގެ ސަރުކާރުގައި އިއްޒުއްދީން ފާލަން ދިވެހިންގެ ސަގާފަތް ދައްކުވައިދޭނެ ގޮތަކަށް ހެދުމަށް ފަހު ހުޅުވުމުގެ ރަސްމިއްޔާތުގައި ވެސް ރައީސް ވަނީ ސަލްޓަން ޕާކް ތަރައްގީ ކުރާނީ މާލޭގައި މި ވަގުތު ކުޅެވެން ނެތް ކުޅިވަރުތައް ވެސް ކުޅެވޭނެ ގޮތަށް ކަމަށް ވިދާޅުވެފަ އެވެ.
އެ ދުވަހު މިސާލެއްގެ ގޮތުގައި އެމަނިކުފާނު ފާހަގަ ކުރެއްވީ ބޯލިން އެލީގެ ކުޅިވަރެވެ.
ސަލްޓަން މިހާރު ފެންނަން އޮތް ގޮތަށް “އެޑިއުޓެއިންމަންޓް އެންޑް ހެރިޓޭޖް” ކޮންސެޕްޓަށް ތަރައްގީކޮށް “ރަސްރަނި ބަގީޗާ” ގެ ނަމުގައި ހުޅުވީ ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. އެ މަސައްކަތް ގެންދެވީ އޭރު ހައުސިން މިނިސްޓަރުގެ ހައިސިއްޔަތުން، މިހާރުގެ ރައީސް މުއިއްޒުގެ ބެއްލެވުމުގެ ދަށުންނެވެ.