ތާރީހާއި ސަގާފަތާއި ތަރިކައިގެ ކަންކަން ދިރުވުމުގެ ނަމުގައި ހައްދު ފަހަނައަޅައި ދިއުމެއް ނެތް ކަމަށާއި އެފަދަ ހަރަކާތްތައް ހުށަހަޅައިދޭއިރު ދީނީ ހަމަތަކާއި އުސޫލުން ބޭރު ނުވާނެކަން ކަށަވަރު ކުރައްވާނެ ކަމަށް ދިވެހި ލެންގުއޭޖް، ކަލްޗާ އެންޑް ހެރިޓޭޖް މިނިސްޓަރު އާދަމް ނަސީރު އިބްރާހީމް ވިދާޅުވެއްޖެ އެވެ.
ކަލްޗާ މިނިސްޓަރު އެހެން ވިދާޅުވެފައި ވަނީ އެ މިނިސްޓްރީން ފިތުރު އީދު ފާހަގަކުރުމަށް ކުރިއަށް ގެންދިޔަ ހިއްޗަށް ވަޑައިގަތުގެ ތަމްސީލަށް އަމާޒުވި ފާޑުކިޔުންތަކާ ގުޅިގެންނެވެ.
ހިއްޗަށް ވަޑައިގަތުމުގެ ތަމްސީލު ކުރިއަށް ގެންގޮސްފައި ވަނީ މި އަހަރުގެ ފިތުރު އީދުގެ ފުރަތަމަ ދުވަހުގެ ރޭގަ އެވެ. އެ ތަމްސީލުގައި ދިވެހިރާއްޖޭގެ ގައުމީ ޔުނިވާސިޓީ، މޯލްޑިވްސް އެއާޕޯޓްސް ކޮމްޕެނީ، މޯލްޑިވްސް ކަސްޓަމްސް ސާވިސް، ވިލާ އިންޓަނޭޝަނަލް ހައި ސްކޫލުގެ އިތުރުން ދިވެހިރާއްޖޭގެ ގައުމީ ކެޑޭޓް ކޯ އިން ބައިވެރިވި އެވެ.
ކަލްޗާ މިނިސްޓަރު އާދަމް ނަސީރު ވިދާޅުވީ ދީނާ ހިލާފު ބިދުއަވެރި އަމަލުތަކުގެ ގޮތުގައި މި ޒަމާނުގެ ދިވެހި ދީނީ އިލްމުވެރިން ފާހަގަކުރައްވާ ކަންކަން ތަމްސީލުން އުނިކޮށްފައިވާ ކަމަށެވެ. އެކަމަކީ އެނގިގެން މަޝްވަރާ ކުރެވިގެން ގަސްދުގައި ކުރިކަމެއް ކަމަށެވެ. އެގޮތުން ޒިޔާރަތްތަކަށް ގޮސް ކުރެވޭ ބައެއް ކަންކަމާއި މިހާރުގެ ހާލަތާއި ނުގުޅޭ ބައެއް ކަންކަން ޒަމާނުގެ ހާލަތަށް ފައްތާފައިވާނެކަން ފާހަގަކުރެއްވި އެވެ.
“ތަރިކަ އާއި ސަގާފަތުގެ ނަމުގައި ހައްދު ފަހަނައަޅައި ނިއުމެއް ނެތް. ހިއްޗަށް ވަޑައިގަތުމުގެ ތަމްސީލު ކުރިއަށް ގެންގޮސްފައި އެ ވަނީ ރަނގަޅަށް. ޒިޔާރަތް ދޮށަށް ދިއުން ފަދަ ބިދުއަތަށް އުނިކުރީ ގަސްދުގައި. ބައިވެރީން ހުސްގަޔާ ނުބައިތިއްބަން ނިންމީ ވެސް ގަސްދުގައި. އެގޮތް ތާރީހުން ފެންނަން ވެސް އެބަހުރި،” އާދަމް ނަސީރު ވިދާޅުވި އެވެ.
ކަލްޗާ މިނިސްޓަރު ވިދާޅުވި ގޮތުގައި އެވޭލާ ފޮޓޯތަކަށް ބަލާއިރު ހިއްޗަށް ވަޑައިގަތުމުގެ ރަސްމިއްޔާތުގައި ލޮންސިވެރީން އޭރު ތިއްބަވަނީ މަތިހަށި ހުހަށް ހުސްގަޔާ ކަމަށާއި ހިނގަނީ ހުސްފައިގައި ކަމުގަ އެވެ. އެހެންނަމަވެސް އޭގެފަހުގެ ފޮޓޯތަކުގައި ލިބާސް ލާފައިވާތީ ފެންނަ ކަމުގަ އެވެ. އެ ދެ ގޮތުން ކުރެ ކޮމިޓީއަށް ފެނިވަޑައިގަތީ ހިއްޗަށް ވަޑައިގަތުމުގެ ތަމްސީލުގައި ލިބާސް ލުމަށް ކަމުގައި ފާހަގަކުރެއްވި އެވެ.
ބައިވެރީން ހުސްފައިގައި ނުހިންގުމަށް ނިންމީ ވެސް މާލޭގައި ހިމުން ދޮންވެލީގެ މަގުތައް ކުރިން ހުރި ނަމަވެސް މިހާރުގެ މަގުތައް ތަފާތުވުމުން ކަމުގަ އެވެ.
ހިއްޗަށް ވަޑައިގަތުގެ ތަމްސީލު އިންތިޒާމު ކޮށްފައި ވަނީ ކަލްޗާ މިނިސްޓްރީން ނެގި ހާއްސަ ކޮމިޓީއަކުން ކަމަށް އާދަމް ނަސީރު ވިދާޅުވި އެވެ. އެ ކޮމިޓީގައި ހިއްޗަށް ވަޑައިގަތުމުގެ ރަސްމިއްޔާތު ދެކެވަޑައިގަތް ބޭފުޅުންނާއި ތާރީހު އިލްމުވެރިން ހިމެނިވަޑައިގަންނަވާ ކަމުގަ އެވެ.
ކަލްޗާ މިނިސްޓަރު ވިދާޅުވީ ދީނީ ހަމަތަކާ އެއްގޮތަށް ކުރިއަށް ގެންދިއުމަށް އުނިކުރި ކަންތައްތައް ފިޔަވައި ހިއްޗަށް ވަޑައިގަތުމުގެ ތަމްސީލުން ފެނުނު ހުރިހާ ކަމެއް ވެސް އަސްލާ އެއްގޮތްވާނެ ކަމަށެވެ. އަސްލާ އެއްގޮތް ކުރުމުގެ މަގުސަދުގައި ތާރީހުގެ ހަރަކާތްތައް ހުށަހަޅައިދޭއިރު ދީނީ ހަމަތަކާއި އުސޫލުން ބޭރު ނުވާނެކަން ކަށަވަރު ކުރައްވާނެކަން ވެސް ފާހަގަކުރެއްވި އެވެ.