ދިވެހި ހައްޖުވެރިން އަރަފާތު ބިމުގައި، އެންމެންގެ ހާލު ވެސް ރަނގަޅު

މި އަހަރު ރާއްޖެއިން ހައްޖުގެ އަޅުކަމަށް ދިޔަ ހުރިހާ ހައްޖުވެރިން އަރަފާތު ބިމަށް ގޮސްފި އެވެ.

ހައްޖުވެރިން އަރަފާތު ބިމަށް ދިއުމަށް ދަތުރު ފަށާފައި ވަނީ ރޭގެ ވަގުތެއްގަ އެވެ. ދިވެހި ހައްޖު މިޝަނުން ބުނީ މައްކާ ގަޑިން 3:30 ވީއިރު، ދިވެހި ހުރިހާ ހައްޖުވެރިންނަށް އަރަފާތު ޓެންޓުތަކާ ހަމައަށް ދެވިފައިވާ ކަމަށެވެ.

ހައްޖުވެރިންގެ ހާލު ވެސް ރަނގަޅު

ހުރިހާ ހައްޖުވެރިންގެ ހާލު ޖުމްލަ ގޮތެއްގައި ރަނގަޅު ކަމަށާއި ހައްޖުވެރިން މިއަދު ވަގުތުތައް ހޭދަކުރާނީ އަރަފާތުގައި ގާއިމުކޮށްފައިވާ ޓެންޓުތަކުގައި ކަމަށް އެ މިޝަނުން ބުންޏެވެ.

ދިވެހި ހައްޖުވެރިން އަރަފާތުގައި ތިބުމަށް ހާއްސަކޮށްފައިވާ ޓެންޓުތައް ކައިރީ ހުންނަވައި މޯލްޑިވްސް ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވީ ޓެންޓުތަކަށް ހައްޖުވެރިން ގެނައުމުގެ މަސައްކަތް ފެށި ހިސާބުން އެ ކޯޕަރޭޝަނުން މަސައްކަތް ކުރަމުން ދިޔައީ މިއަދުގެ އިރުއެރުމުގެ ކުރިން ހުރިހާ އެންމެން އެ ބިމަށް ގެންދިއުމަށް ކަމަށެވެ.

“ފަތިހު ތިންގަޑި ބައިވީއިރުގައި އަޅުގަނޑުމެންނަށް ހުރިހާ ހައްޖުވެރިން ގެނެސް އަރަފާތު ޓެންޓުތަކަށް ވެއްދި، ސެޓްލް ވެވިއްޖެ،” ދިވެހި ހުރިހާ ހައްޖުވެރިންގެ ހާލު ރަނގަޅުކަން ފާހަގަކުރައްވާ ޝަކީލް ވިދާޅުވި އެވެ.

ހޫނު ވަރަށް ގަދަވާނެ، ސަމާލުވުމަށް ހައްޖުވެރިންނަށް އިލްތިމާސެއް

ސައުދީގެ ކަމާ ބެހޭ ފަރާތްތަކުން ވެސް ވަނީ އެ ގައުމުގެ ގަޑިން ހެނދުނު 10 އިން ފެށިގެން ހަވީރު 4 ޖެހުމާ ހަމައަށް ޓެންޓުތަކުން ނިކުތުން ރައްކާތެރި ނޫން ކަމަށް ބުނެފަ އެވެ.

އެގޮތުން ޖަމާއަތް ހަދައިގެން ނުހިނގުމަށާއި މުޒްދަލިފާއަށް ހިނގާފައި ދިއުމުގެ ބަދަލުގައި ދަތުރުފަތުރު ކުރަން ހާއްސަކޮށްފައިވާ އުޅަނދު ބޭނުން ކުރަން ވަނީ އަންގާފަ އެވެ. އޭގެ އިތުރުން ކަނޑައެޅިފައިވާ އިރުޝާދުތަކާ އެއްގޮތަށް ދަތުރުފަތުރު ކުރުމަށް ވެސް ވަނީ އިލްތިމާސްކޮށްފަ އެވެ.

މި އަހަރު ރާއްޖެއިން އެއްހާސް މީހުން ވަނީ ހައްޖުގެ އަޅުކަމަށް ސައުދީ އަރަބިއްޔާއަށް ގޮސްފަ އެވެ. ހުރިހާ ހައްޖުވެރިން ވެސް ދިޔައީ ހައްޖު ކޯޕަރޭޝަނުގެ ހަވާލުގަ އެވެ.

ހައްޖު މަހުގެ ނުވަ ވަނަ ދުވަހުގެ މެންދުރުފަހު އަރަފާތުގައި މަޑުކުރުމަކީ ހައްޖުގެ އެންމެ މުހިންމު ރުކުނެވެ. އެ ބިމަށް ދުވަހުގެ އިރުއޮއްސުމުގެ ކުރިން ނުދެވޭ މީހުންނަށް ހައްޖު ނުލިބޭނެ އެވެ.

އަރަފާތަށް ދިޔުމަށް ފަހު ހައްޖުވެރިން މުޒްދަލިފާގައި ރޭ ކުރާނެ އެވެ. މުޒްދަލިފާގައި ރޭ ކުރުމަށް ފަހު ބޮޑު ޖަމްރާއަށް ހިލައުކުން ކުރިއަށް ގެންދިޔުމަށް ފަހު ހަދްޔު ކަތިލާނެ އެވެ. އެއަށް ފަހު މިނާގައި ރޭ ކުރުމަށް ފަހު، ތިން ޖަމްރާއަށް ހިލަ އުކާނެ އެވެ.

އެއަށް ފަހު ހައްޖުވެރިން ދެން ދާނީ ތަވާފުލްއިފާޟާ ކުރުމާއި ސަފާ ފަރުބަދަ އާއި މަރްވާ ފަރުބަދަ އާ ދެމެދު ސައުޔު ކުރުމަށެވެ. ހައްޖުވެރިންގެ އެންމެ ފަހު ކަމެއްގެ ގޮތުގައި ކުރިއަށް ގެންދާނީ ވަދާއުގެ ތަވާފުކޮށް ހައްޖުގެ އަޅުކަން އަދާކޮށް ނިންމުމެވެ.