އިމިގްރޭޝަންގެ ތެރެއިން އޮފިސަރުންތަކެއް މަގާމުގެ ނާޖާއިޒު ފައިދާ ނަގައިގެން ބިދޭސީއެއްގެ އަތުން ފައިސާ ނެގި މައްސަލާގައި ކުށަށް އިއުތިރާފުވި އޮފިސަރު އިތުރަށް ޖަލުގައި ހުންނަން ނުޖެހޭ ގޮތަށް މިއަދު ދެ މަހުގެ ހުކުމެއް ކްރިމިނަލް ކޯޓުން އިއްވައިފި އެވެ.
މި މައްސަލަ އަކީ އިމިގްރޭޝަން ބައެއް މުވައްޒަފުން ގަވާއިދާ ހިލާފު އޮޕަރޭޝަން އެއްގައި ބިދޭސީ މަސައްކަތްތެރިންގެ ބަޔަކު ހައްޔަރު ކުރުމުގެ އިތުރުން އޭގެތެރެއިން އެކެއްގެ އަތުން 530,000 ރުފިޔާ ނެގި މައްސަލައެވެ.
މި މައްސަލައިގައި އަލްސަންގެ އިތުރުން ކުރީގެ ކޮންޓްރޯލާ ޖެނެރަލް ޝަމްއާން ވަހީދާއި އިތުރު ތިން އޮފިސަރަކަށް ވެސް ދައުވާކޮށްފައިވެ އެވެ. މި މައްސަލާގައި ޝަރީއަތް ނިމެންދެން ޝަމްއާން ވަނީ ބަންދުކޮށްފަ އެވެ. އެހެން މީހުން ތިބީ ބަންދަކު ނޫނެވެ.
މިއަދު ކްރިމިނަލް ކޯޓުން ހުކުމް ކުރީ ދައުލަތާ އެކު އަލްސަން ހެދި އެއްބަސްވުމާ އެއްގޮތަށެވެ. މި ކުށުގެ އަސާސީ އަދަބަކީ 9 މަހާއި 18 ދުވަހެވެ. ނަމަވެސް ހުކުމް ކޮށްފައި ވަނީ ދެ މަހާއި ތިން ދުވަސް އެކަނި ޖަލު ބަންދުގެ ގޮތުގައި ބޭއްވުމަށެވެ. ބާކީ ބައި ޖުރިމަނާއަށް ބަދަލުކޮށް ޖޫރިމަނާގެ ގޮތުގައި 45,000ރ. އެއް އަހަރު ތެރޭގައި ދައްކާ ގޮތަށެވެ. އެއީ އިއުތިރާފު އެއްބަސްވުމުގައިވާ ގޮތެވެ.
މި މައްސަލައިގައި ބަންދުގައި 2 މަހާއި 3 ދުވަސް އަލްސަން ހޭދަކޮށްފައިވެއެވެ. އެހެންކަމުން އެ މުއްދަތު ހުކުމުން އުނިކުރުން އެއްވެސް ޖަލު ހުކުމެއް ތަންފީޒު ކުރާކަށް ނުޖެހޭނެއެވެ.