އައްޑޫ ސިޓީއަށް ކުރިމަތިވެފައިވާ ކަރަންޓުގެ މައްސަލައަށް ދާއިމީ ހައްލެއް ގެނައުމަށް ފަށާ އިންޖީނުގޭގެ މަޝްރޫއު ފެނަކަ ކޯޕަރޭޝަނުން ދުބާއީގެ ކުންފުންޏަކާ ހަވާލުކޮށްފިއެވެ.
އެ މަޝްރޫއު ހަވާލުކޮށްފައި ވަނީ ދުބާއީގެ ޑެފިނިޓް ސޮލިއުޝަންސްއާއެވެ.
ގާތްގަނޑަކަށް 31މިލިއަން ޑޮލަރުގެ މި މަޝްރޫއުގެ ދަށުން އައްޑޫ އިންޖީނުގޭގައި ބެހެއްޓުމަށް ހަމަޖެހިފައިވާ ވަނީ ބެލްޖިއަމް ކުންފުންޏެއް ކަމަށްޗާ އަންގްލޯ ބެލްޖިއަން ކޯޕަރޭޝަން (އޭބީސީ)ގެ އިންޖީނުތަކެކެވެ.
ފެނަކައިން ބުނެފައިވަނީ ޔޫރަޕުގައި ބޭނުންކުރާ މި ބްރޭންޑްގެ އިންޖީނުތަކަކީ މިހާރު އައްޑޫގައި ހުރި ހައިސްޕީޑް އިންޖީނުތަކާ ހިލާފަށް ލޯ ސްޕީޑްގެ ޒަމާނީ އިންޖީނުތަކެއް ކަމަށެވެ.
ރައީސް ޑރ. މުހައްމަދު މުއިއްޒު ރޭ ވިދާޅުވެފައިވަނީ ފެނަކައިން ސޮއިކުރި އެއްބަސްވުމުގެ ސަބަބުން ކުރިއަށް އޮތް 20އަހަރަށް އައްޑޫގެ ކަރަންޓުގެ މައްސަލަ ހައްލުވެގެން ދާނެ ކަމަށެވެ. އެގޮތުން 26މެގަވޮޓްގެ ކަރަންޓު ފޯރުކޮށްދޭނެ ނިޒާމު މި އެއްބަސްވުމުގެ ދަށުން ގާއިމްކުރެވިގެންދާނެ ކަމަށް ރައީސް ވިދާޅުވިއެވެ.
އައްޑޫއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް 2024ވަނަ އަހަރުވެސް މި މަޝްރޫއު ހިންގަން ބަޔަކާ ހަވާލުކޮށްފައިވެއެވެ. ޗައިނާ ކުންފުންޏަކާ ހަވާލުކުރި އެ މަޝްރޫއު ކުރިއަށް ނުދާތީ ސަރުކާރުން ވަނީ އެއްބަސްވުން ބާތިލުކޮށްފައެވެ.