ބޭރުން އަންނަ އާގުބޯޓުތަކަށް ޕޯޓް ލިމިޓް އޭރިއާ 24 ގަޑިއިރަށް ހުޅުވާލަން ނިންމައިފިއެވެ.
ޓްރާންސްޕޯޓް މިނިސްޓަރު މުހައްމަދު އަމީން މިއަދު އެކްސްގައި ވިދާޅުވީ އެގޮތަށް ބޭރުން އަންނަ އާގުބޯޓުތަކަށް 24 ގަޑިއިރު ޕޯޓް ލިމިޓް އޭރިޔާއަށް ވަދެވޭގޮތަށް ހުޅުވާލާނީ މާދަމާއިން ފެށިގެން ކަމަށެވެ.
މިނިސްޓަރު ވިދާޅުވީ މިއީ 1988 ވަނަ އަހަރުން ފެށިގެން އަމަލުކުރަމުން އައި އުސޫލު ބަދަލުކޮށް، އިގުތިސާދީ ގޮތުން އެޅުނު މުހިންމު ފިޔަވަޅެއް ކަމަށެވެ.
އަދި އެ ބަދަލާއެކު،ކުރިންވެސް އުޅަނދުފަހަރަށް ދެމުންއައި ކްލިޔަރެންސް ދިނުމާއި ޕައިލޮޓޭޖުގެ ހިދުމަތް ދިނުމުގެ ކަންކަން ވެސް 24 ގަޑި އިރު ހިނގަމުން ދާނެކަމަށް މިނިސްޓަރު ވިދާޅުވިއެވެ.
ދިވެހިރާއްޖެއަށް އަންނަ އާގު ބޯޓުފަހަރަށް، 26 ޖެނުއަރީ 2026 ވާ ހޯމަ ދުވަހުން ފެށިގެން 24 ގަޑިއިރު ޕޯޓް ލިމިޓް އޭރިޔާއަށް ވަދެވޭގޮތަށް ހުޅުވާލުމަށް ވަނީ ނިންމާފައި!
މިއީ،1988 ވަނަ އަހަރުން ފެށިގެން އަމަލުކުރަމުން އައި އުސޫލު ބަދަލުކޮށް، އިޤްތިޞާދީ ގޮތުން އެޅުނު މުހިންމު… pic.twitter.com/KtxEiYrlha
— Mohamed Ameen (@ameen3d) January 25, 2026
“މި ނިންމުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ހަރުދަނާ ސިޔާސަތުތަކުގެ ދަށުން ގެނެވުނު ވަރަށް މުހިންމު ހެޔޮ ބަދަލެއް!” މިނިސްޓަރު ވިދާޅުވިއެވެ.
އެ ބަދަލު ގެނައުމުގެ ކުރިން މެންދަމު 12 އިން ހެނދުނު ހަޔަކަށް ރާއްޖެއިން ބޭރުން އަންނަ ކަނޑު ބޯޓުތައް ރާއްޖޭގެ ކަނޑުގެ ބަނދަރުތަކަށް ނުވަދެވޭގޮތަށް އުސޫލު އޮތީ ކަނޑައަޅައިފައެވެ. އެއީ 1988ވަނަ އަހަރު ސްރީލަންކާގެ ތަމަޅަ ޓައިގަރުން ކަނޑުމަގުން ރާއްޖެ އަރައި ހިންގި އުދުވާނާ ގުޅިގެން ކަނޑައެޅި އުސޫލެކެވެ.