ނ. ވިހަފަރުގައި އެއާޕޯޓު ތަރައްގީކުރަން ބިން ހިއްކަން މިއަދު ފަށައިފިއެވެ.
ވިހަފަރުގައި އެއާޕޯޓެއް ތަރައްގީކުރުމަށް ރައީސް ޑރ. މުހައްމަދު މުއިއްޒު ގަރާރަކުން ކަނޑައަޅުއްވައި އެކަން އިޢުލާންކުރެއްވީ 2024ވަނަ އަހަރުގެ މާޗު މަހުގައެވެ. އަދި މިދިޔަ އަހަރު ޖުލައި މަހު ނ. އަތޮޅުގެ ރައްޔިތުންނާ ބައްދަލުކުރައްވައި އެމަނިކުފާނު އޮތީ މި އަހަރުގެ ކުރީކޮޅު އެ މަޝްރޫއުގެ އަމަލީ މަސައްކަތް ފެށޭނެކަމުގެ ޔަގީންކަން ވެސް ދެއްވައިފައެވެ.
ރައީސްގެ ވައުދުފުޅާ އެއްގޮތަށް އެ އެއާޕޯޓު ތަރައްގީކުރަން ބިން ހިއްކުމުގެ އަމަަލީ މަސައްކަތް މިއަދު މެންދުރު ބޭއްވި ހާއްސަ ރަސްމިއްޔާތެއްގައި ވަނީ ފަށައިފައެވެ. ރައީސް މުއިއްޒު ވެސް ބައިވެރިވެވަޑައިގެންނެވި އެ ރަސްމިއްޔާތުގައި ބިން ހިއްކުމުގެ އަމަލީ މަސައްކަތް ފައްޓަވައިދެއްވީ އިކޮނޮމިކް މިނިސްޓަރު މުހައްމަދު ސައީދު އަދި އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދުއެވެ.
ނ. މާފަރުގައި ވައިގެބަނދަރެއް އޮތްކަމުގައި ވިޔަސް، އެ އަތޮޅު ހޮޅުދޫ، ވެލިދޫ އަދި ފޮއްދޫ ހިމެނޭ ސަރަހައްދުގައި އިތުރު ވައިގެބަނދަރެއް އޮތުން މުހިންމުކަމަށް ރައީސް މުއިއްޒު ދެކެވަޑައިގަންނަވައެވެ. ވަކިން ހާއްސަކޮށް ފަތުރުވެރިކަމުގެ ގޮތުން ކުރިއަރާފައިވާ، އަދި ކުރިއަރަމުންދާ އަތޮޅެއްގެ ގޮތުންނާއި، އިގުތިސާދު ސިންދަފާތު ކުރުމުގެ ބޮޑެތި މަޝްރޫއުތައް ހިނގާނޭ އަތޮޅެއްގެ ގޮތުން، އެ ވައިގެ ބަނދަރު އޮތުމުން ދުރު ރާސްތާގައި ލުއިފަސޭހައާއި ފައިދާ ލިބޭނޭ ކަމުގައިވެސް އެމަނިކުފާނު ގަބޫލުފުޅުކުރައްވައެވެ.