ކުޑަކުދިންނަށް ޖިންސީ ގޯނާކުރަން އެ ކުދިން ޓްރެފިކިން ކުރަން ބޮޑު އޮޕަރޭޝަނެއް ހިންގި ޖެފްރީ އެޕްސްޓެއިންއާ ރާއްޖޭގެ ރައީސްއަކު ބައްދަލުކުރިކަމަށް ބުނާ އީމެއިލެއް ލީކުވެއްޖެ އެވެ.
ކާކުކަން ނޭނގޭ ބަޔަކު ލީކްކޮށްލާފައިވަނީ އެޕްސްޓެއިންއާއި އިސްރާއިލުގެ ކުރީގެ ބޮޑުވަޒީރު އިހޫދު ބަރާކްއާއެކު ކޮށްފައިވާ އީމެއިލްތަކެވެ.
ދެހާސް ސާދަ ވަނަ އަހަރު އެޕްސްޓެއިން އީމެއިލްއެއްގައި ބުނި ގޮތުގައި ރާއްޖޭގެ ކުރީގެ ރައީސްއަކާއެކު ބައްދަލުވުމެއް ނިއު ޔޯކްގައި އޮންނާނެ އެވެ. ނަމަވެސް ރައީސްގެ ނަމެއް ބުނެފައެއް ނުވެއެވެ.
އޭރު ކުރީގެ ރައީސްގެ ގޮތުގައި ތިއްބަވާނީ ރައީސް މައުމޫން އަބްދުލް ގައްުޔޫމްއާއި މުހައްމަދު ނަޝީދުގެ އިތުރުން މުހައްމަދު ވަހީދު ހަސަން މަނިކު އެވެ.
އެ މައްސަލައާ ގުޅިގެން މިހާތަނަށް ވާހަކަ ދައްކަވާފައިވަނީ ރައީސް ނަޝީދު އެކަންޏެވެ.
އެ ބައްދަލުވުން ހިނގި ދުވަސް ވަރު ރައީސް ނަޝީދު ހުންނެވީ އެމެރިކާގައި ނޫންކަން ހާމަވާ ޕޯސްޓެއް އެކްސްގައި މީހަކު ކޮށްފައިވާ އިރު ރައީސް ނަޝީދު ވެސް އެ ޕޯސްޓު ވަނީ ރީޕޯސްޓްކުރައްވައިފަ އެވެ.
އެ ދުވަސްވަރު ރައީސް މައުމޫން ވެސް ރާއްޖޭގައި ނެތް ކަން ހާމަވާ ޕޯސްޓްތަކާއި ފޮޓޯތައް މީހުން އެކްސްގައި ދައްކާފައިވެ އެވެ. ދެން ބާކީ ހުންނެވި ވަހީދަށް ތުހުމަތުކޮށް ވާހަކަތަކެއް ދެކެވޭއިރު އެ ކަމާ ގުޅޭ ގޮތުން އޭނާ ވަކި އެއްޗެއް ވިދާޅެއް ނުވެ އެވެ.
އެޕްސްޓެއިން ވަނީ ޖިންސީ ގޯނާކުރަން ދުނިޔޭގެ މަޝްހޫރު ސިޔާސީ ފަރާތްތަކާއި ނުފޫޒު ފަދަ ފަރާތްތަކަށް ކުޑަކުދިން ޓްރެފިކްކޮށް އެ މީހުން ހިންގި ނަހަމަ ގުޅުންތައް ރިކޯޑްކޮށް ބްލެކްމެއިލްކޮށްފަ އެވެ.
އެޕްސްޓެއިންއާ ގުޅުން އޮތް ފަރާތްތަކުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްވެސް ހިމެނިވަޑައިގަންނަވަ އެވެ.
އެޕްސްޓެއިން ވަނީ އެ މައްސަލަތަކާ ގުޅިގެން ޖަލުގައި ހުއްޓާ 2019 ވަނަ އަހަރު އަމިއްލައަށް ދަންޖެހިގެން މަރުވެފަ އެވެ.