އަރިދަފުސް ރޯގާގެ ޖެހިގެން ރިޕޯޓްކުރޭ އަދަދު އިތުރުވަމުންދާތީ، ރޯގާގެ އަލާމާތެއް ހުރިނަމަ މާސްކު އެޅުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން ބުނީ، އަރިދަފުން ރޯގާ އާއި ނޭވާލާ ނިޒާމަށް ޖެހޭ އެހެނިހެން ބަލިތަކުން ރައްކާތެރިވުމަށްޓަކައި ގިނަގިނައިން ސައިބޯނި ލައިގެން އަތް ދޮވުމަށާއި، ސެނިޓައިޒާއިން އަތް ސާފު ކުރުމަށް ޚާއްޞަ ސަމާލުކަމެއް ދިނުމަށް އެޗްޕީއޭއިން އިލްތިމާސް ކުރެއެވެ.
“ހުން އައިސް ކެއްސާ ކިނބިހި އަޅާ، ރޯގާގެ އެއްވެސް އަލާމާތެއް ހުރިނަމަ އަނގަޔާ ނޭފަތް ރަނގަޅަށް ނިވާވާނެހެން މާސްކް އަޅުއްވާ” އެޗްޕީއޭއިން ބުނެފައިވެއެވެ.
އަރިދަފުސް ރޯގާ 🦠ރިޕޯޓްކުރެވިފައިވާ ވަރު ވަނީ އިތުރު ވެފާ, ވީމާ މިދުވަސްވަރު:
ގިނަގިނައިން 🧼 ލައިގެން އަތް ދޮވުން އިތުރު ކުރައްވާ ! pic.twitter.com/gKHILwWrc5
— Health Protection Agency (@HPA_MV) November 29, 2025
މީގެއިތުރުން، މީހުން ގިނައިން އެއްވެ އުޅޭ ތަންތަނަށް ކުޑަކުދިންނާއި އުމުރުން ދުވަސްވީ މީހުންނާއި ނޭވާލާ ނިޒާމުގެ ބަލިތައް ހުންނަ މީހުން ނުދިއުމަށާއި ހުމާ ރޯގާގެ އެއްވެސް އަލާމާތެއް ފާހަގަ ވާނަމަ ކުދިން ސްކޫލަށް ނުފޮނުވުމަށް ވަނީ އިލްތިމާސްކޮށްފައެވެ. އަދި ބަލިމީހުންނަށް ޒިޔާރަތް ކުރާނަމަ، ކުޑަކުދިން ނުގެންދިއުމަށް ވެސް ވަނީ އިލްތިމާސްކޮފައެވެ.
ދުވަސްވަރަކީ ވިއްސާރަ ދުވަސްވަރަކަށްވެފައި، ސާފުތާހިރުކަމަށް ޚާއްސަ ސަމާލުކަމެއް ދިނުމަށާއި މަދިރި އުފެދޭ ގޮތަށް ހުންނަ ތަންތަން ނައްތާލުމަށާއި މަދިިރި ހެފުމުން ރައްކާތެރިވުމަށް ވެސް އެޗްޕީއޭއިން އިލްތިމާސް ކުރެއެވެ.